ՀՀ էներգետիկայի նախարարը կարող է լքել պաշտոնը
ԵՐԵՎԱՆ, 26 փետրվարի. /ԱՌԿԱ/. Իշխանական շրջանակներում լուրեր են արծարծվում այն մասին, որ Վերահսկիչ պալատի նախագահի տեղակալ Լևոն Յոլյանը ցանկանում է զբաղեցնել էներգետիկայի նախարարի պաշտոնը, և նա ջանք չի խնայում իր նպատակին հասնելու համար, գրում է «Հայկական ժամանակ» թերթը։
«Միաժամանակ, Յոլյանը բավականին մտերիմ հարաբերություններ ունի Սերժ Սարգսյանի հետ»,– նշվում է գրառման մեջ։
Հրապարակման հեղինակները գրում են, որ վերջին ժամանակներում ակտիվացել են խոսակցություններն այն մասին, թե էներգետիկայի և բնական պաշարների նախարար Երվանդ Զախարյանը շուտով կլքի պաշտոնը։ Դրան զուգընթաց նշվում է նաև, որ Յոլյանն անում է հնարավորինս այդ պաշտոնը ստանալու համար։
«Էներգետիկայի նախկին ղեկավար Արմեն Մովսիսյանի մահից հետո Յոլյանը ցանկանում էր զբաղեցնել այդ պաշտոնը, սակայն նախարար դարձավ Զախարյանը, ասում են, որ Յոլյանը նեղացել է Սերժ Սարգսյանից և նույնիսկ մի քանի ամիս աշխատանքի դուրս չի եկել ՎՊ–ում»,– գրում են հոդվածի հեղինակները։ -0-
Ծանոթացեք լուրերին առաջինն ու քննարկեք դրանք մեր Telegram-ում
13:17 26.02.2016
