«ԱԳԲԱ Լիզինգ»–ը կֆինանսավորի մաքուր էներգիայի արտադրությունը Հայաստանի չգազաֆիկացված համայնքներում
ԵՐԵՎԱՆ, 5 հոկտեմբերի. /ԱՌԿԱ/. «ԱԳԲԱ Լիզինգ» ընկերությունը Հայաստանի չգազաֆիկացված համայնքներին հնարավորություն կընձեռի արտոնյալ պայմաններով ձեռք բերել մաքուր էներգիա ստանալու համար նախատեսված սարքավորումներ, հայտնում է ընկերության մամուլի ծառաությունը։
ԱԳԲԱ Լիզինգի և «Հայաստանի վերականգնվող էներգետիկայի և էներգախնայողության» հիմնադրամի միջև ստորագրվել է Հայաստանում չգազաֆիկացված համայնքների էներգաարդյունավետության բարձրացմանն ուղղված համագործակցության պայմանագիր։
Պայմանագրի շրջանակներում ՀՀ շուրջ 280 համայնքի բնակիչներ և իրավաբանական կազմակերպություններ հնարավորություն կստանան արտոնյալ պայմաններով ձեռք բերել մաքուր էներգիա ստանալու համար նախատեսված սարքավորումներ` կատարելով նվազագույն ներդրումներ:
ԱԳԲԱ Լիզինգի կողմից առաջարկվող ֆինանսավորման արտոնյալ պայմաններն են՝ կանխավճար՝ սկսած 0%-ից, տարեկան տոկոսադրույք՝ 7%, մարման ժամկետ՝ մինչև 8 տարի։ Ֆինանսովորումը կիրականացվի ՀՀ դրամով:
«2014թ-ին ԱԳԲԱ Լիզինգը ստեղծեց «Գրին Լիզինգ» ենթաբրենդը, որով սկսեցինք իրականացնել մաքուր էներգիա ստանալու համար նախատեսված սարքավորումների ձեռք բերման ֆինանսավորում։ «Արևային էներգիայի վերարտադրման և էներգախնայող սարքավորումների ֆինանսավորումը մեզ համար գերակա ուղղություններ են, որի մասին փաստում են ԱԳԲԱ Լիզինգի կողմից արդեն իրականացված ավելի քան 500 «գրին» ծրագրի ֆինանսավորում», – նշեց ԱԳԲԱ Լիզինգի գլխավոր տնօրեն Արսեն Բազիկյանը:Նրա խոսքով, ընկերությունը կշարունակի մեծ ուշադրություն դարձնել նմանատիպ նախագծերի իրականացմանը, քանի որ այս ոլորտը, բացի բիզնեսի ուղղություն լինելուց, նաև բանկային խմբի սոցիալական պատասխանատվության դրսևորումն է ինչպես շրջակա միջավայրի պահպանության առումով, այնպես և հասարակության առջև։
ԱԳԲԱ Լիզինգը 2003թ-ի ապրիլին Հայաստանի Հանրապետությունում հիմնադրված առաջին լիզինգային ընկերությունն է, որի բաժնետերերն են` ֆրանսիական «Կրեդիտ Ագրիկոլ Լիզինգ և Ֆակտորինգ» մասնագիտացված Ընկերությունը և ԱԿԲԱ-ԿՐԵԴԻՏ ԱԳՐԻԿՈԼ Բանկը: ԱԳԲԱ Լիզինգը Հայաստանում լիզինգի բացարձակ առաջատարն է՝ շուկայի մոտ 80% մասնաբաժնով:
«ԱԿԲԱ–ԿՐԵԴԻՏ ԱԳՐԻԿՈԼ ԲԱՆԿ» ՓԲԸ–ն (Հայաստանի գյուղացիական փոխօգնության նախկին բանկ, ACBA) հիմնվել է 1995 թվականին Եվրամիության TACIS ծրագրի շրջանակում։ 2006 թվականի սեպտեմբերին Կրեդիտ Ագրիկոլ ֆրանսիական բանկային խումբը դարձել է բանկի ամենախոշոր բաժնետերը` կապիտալում զգալի ներդրումներ կատարելով։ -0-
