«ԱՌԿԱ» գործակալությունը պարգևատրվել է Հայաստանի արդյունաբերողների և գործարարների միության ոսկե մեդալով և պատվոգրով (ՖՈՏՈ)
ԵՐԵՎԱՆ, 11 մայիսի․/ԱՌԿԱ/․ «ԱՌԿԱ» լրատվական գործակալությունը պարգևատրվել է Հայաստանի արդյունաբերողների և գործարարների միության (ՀԱԳՄ) ոսկե մեդալով և պատվոգրով՝ տեղական և միջազգային տնտեսական կյանքի հետևողական ու խորը լուսաբանման համար, ինչպես նաև հիմնադրման 30-ամյակի կապակցությամբ, հայտարարել է ՀԱԳՄ նախագահ Արսեն Ղազարյանը:
«30 տարի առաջ Հայաստանում հայտնվեց մի գործակալություն, որը մեզ տրամադրում էր միջազգային և տեղական բիզնես-ամփոփագրեր, տեղական և միջազգային տեղեկատվական տեղեկագրեր: Դա «ԱՌԿԱ» գործակալությունն էր, և մենք չհասցրինք աչք փակել, երբ լրացավ «ԱՌԿԱ»-ի 30 տարին», - ասել է նա երկուշաբթի՝ ՀԱԳՄ խորհրդի ընդլայնված նիստի ժամանակ:
Ղազարյանը հիշեցրել է, որ «ԱՌԿԱ» գործակալությունը՝ տնօրեն Կոնստանտին Պետրոսովի գլխավորությամբ, Հայաստանում առաջինն է հիմնել տեղեկատվական բաց լինելու համար հայկական բանկերի ամենամյա վարկանիշավորման և պարգևատրման պրակտիկան՝ հավելելով, որ ինքը ևս բաժանորդագրված է եղել գործակալության տեղեկատվական պրոդուկտներին:
«Եվ մեր ժամանակներում «ԱՌԿԱ»-ն պահպանում է իր դերը հայկական բիզնես դաշտում», - ընդգծել է ՀԱԳՄ ղեկավարը:
Իր հերթին ՀԱԳՄ փոխնախագահ, Միջազգային ֆինանսական կորպորացիայի (IFC) հայաստանյան գրասենյակի նախկին ղեկավար Ներսես Կարամանուկյանը նշեց, որ Համաշխարհային բանկի համակարգում՝ ՄՖԿ-ում իր աշխատանքի տարիներին, «ԱՌԿԱ» գործակալությունը հատուկ տեղ էր զբաղեցնում ՀԲ տեղեկատվության մյուս աղբյուրների շարքում:
«Ես այդ մասին գիտեի 1999 թվականից և զարմանում էի, որ կա նման գործակալություն, որը պրոֆեսիոնալ եռամսյակային հաշվետվությունների տեսքով Համաշխարհային բանկին էր մատակարարում բանկային հատվածի վերաբերյալ տեղեկագրեր և երկրի շաբաթական տնտեսական իրավիճակի մասին այլ տեղեկատվություն: «ԱՌԿԱ»-ն համարվում էր պաշտոնական աղբյուր: Եթե հղում էիր անում նրան, որ այդ մասին հայտնում է «ԱՌԿԱ»-ն, նշանակում է՝ դա ճշմարտություն է», - ընդգծեց նա:
Կարամանուկյանը հավելեց, որ «ԱՌԿԱ»-ի նորություններից օգտվել են նաև Համաշխարհային բանկի անդամ այլ երկրներ՝ Հայաստանի մասին տեղեկատվություն ստանալիս:
«Այսօր մեզ համար մեծ պատիվ է ստանալ Հայաստանի արդյունաբերողների և գործարարների միության ոսկե մեդալը. այն հատկապես խորհրդանշական է գործակալության հոբելյանական տարում: Այս պարգևը «ԱՌԿԱ»-ի ողջ կոլեկտիվի վաստակն է, որն այս տարիների ընթացքում ստեղծել է պրոֆեսիոնալ և պատասխանատու լրագրություն», - հայտարարեց «ԱՌԿԱ» գործակալության տնօրեն Կոնստանտին Պետրոսովը:
«ԱՌԿԱ» լրատվական գործակալությունը գործում է 1996 թվականի մայիսի 1-ից և Հայաստանի առաջատար գործարար լրատվամիջոցներից մեկն է: Գործակալությունը մասնագիտացած է ֆինանսատնտեսական և քաղաքական տեղեկատվության ոլորտում, ինչպես նաև մշակում է վերլուծական և սպասարկող պրոդուկտներ պրոֆեսիոնալ լսարանի համար: Մեդիահոլդինգի կազմում են նաև Armbanks.am և Arkatelecom.am պորտալները:
Arka.am կայքը կայուն կերպով դասվում է երկրի ամենաշատ մեջբերվող տնտեսական աղբյուրների շարքին և հուսալի տեղեկատվական հարթակ է պրոֆեսիոնալ հանրության, ներդրողների և գործարար լրատվամիջոցների համար:
