«Վերին Լարս» հսկիչ անցակետի երթևեկությունը վերականգնվել է. ՀՀ տրանսպորտի և կապի նախարարություն

ԵՐԵՎԱՆ, 1 սեպտեմբերի. /ԱՌԿԱ/. Վերին Լարս» հսկիչ անցակետի երթևեկությունը վերականգնվել է օգոստոսի 30-ից, հաղորդում է ՀՀ տրանսպորտի և կապի նախարարության մամուլի ծառայությունը:

«Վերին Լարս» հսկիչ անցակետի (Ստեփանծմինդա – Լարս ավտոճանապարհ) երթևեկությունը փակվել էր օգոստոսի 20-ի երեկոյան փլուզման հետևանքով:

«Կատարված մեծածավալ աշխատանքների շնորհիվ Ստեփանծմինդա - Լարս ավտոճանապարհի երթևեկությունը օգոստոսի 30-ին ՝ժամը 13:30-14:00-ի սահմաններում, վերականգնվել է», - նշել են նախարարությունից:

Ըստ հաղորդագրության՝ թեթև մարդատար ավտոմեքենաներին Վերին Լարս սահմանային անցակետով թույլատրում էին մաս-մաս հատել սահմանը: Ճանապարհը բացելուց հետո` մեկ ժամվա ընթացքում, շուրջ 150 ավտոմեքենա արդեն հատել էր սահմանը:  

Ավտոբուսների և բեռնատար ավտոմեքենաների համար երթևեկությունը վերականգնվել է օգոստոսի  31-ից:

Ճանապարհի շահագործումը նախատեսված էր ավելի վաղ, սակայն օգոստոսի 28-29-ը տեղացած անձրևների հետևանքով գետի հունը բարձրացել էր՝ հեղեղելով ճանապարհի ծածկը և դրանով իսկ խոչընդոտելով աշխատանքների ընթացքը:

Ճանապարհի վերականգնման աշխատանքները վերջնական ավարտին հասցնելու նպատակով  առաջիկա օրերին՝ գիշերային ժամերին, երթևեկությունը կդադարեցվի: -0-