ՀԿԵ-ի կոնցեսիան չեղարկելու համար իրավական հիմքեր կան, խնդիրը քաղաքական որոշման մեջ է. Փաշինյան

ԵՐԵՎԱՆ, 7 հոկտեմբերի․ /ԱՌԿԱ/. ՀՀ վարչապետ Նիկոլ Փաշինյանը հայտարարել է, որ «Հարավկովկասյան երկաթուղի» ՓԲԸ-ի հետ կոնցեսիոն պայմանագիրը չեղարկելու համար իրավական հիմքեր կան, սակայն Հայաստանը ցանկանում է Ռուսաստանի հետ գնալ բարեկամական ճանապարհով։

«Մենք եթե հենց այսօր քաղաքական որոշում ունենանք, որ կոնցեսիոն պայմանագիրը չեղարկում ենք, դրա իրավական հիմքերը կան։ Իրավական հիմքերը խնդիր չկա, իրավական հիմքերը կան, խնդիրը քաղաքական որոշման մեջ է», — ասել է Փաշինյանը «Ինֆոկոմ»-ի «Ctrl Z» հաղորդմանը տված հարցազրույցում։

Միաժամանակ վարչապետը նշել է, որ հայկական կողմը չի ցանկանում գնալ այդ ճանապարհով։

«Մենք խնդրել ենք, խնդրում ենք, որ Ռուսաստանի գործընկերները կոնցեսիայի իրավունքը վաճառեն երրորդ երկրի։ Բայց կարևոր նրբություն կա՝ այն պետք է ընդունելի լինի և՛ Հայաստանի, և՛ Ռուսաստանի համար», — ասել է Փաշինյանը։

ՀԿԵ-ի վերաբերյալ Հայաստանի ծրագրերի մասին

2026 թվականի փետրվարին ՀՀ վարչապետ Նիկոլ Փաշինյանը չէր բացառել Ռուսաստանի կողմից հայկական երկաթուղու կառավարման իրավունքը մեկ այլ երկրի, որը բարեկամական է ինչպես Հայաստանին, այնպես էլ Ռուսաստանին, մասնավորապես Կատարին, ԱԱԷ-ին կամ Ղազախստանին փոխանցելու հնարավորությունը:

Նա նաև հայտարարել էր, որ TRIPP ծրագրի շրջանակում մի շարք երկրներ առաջարկում են երկաթուղային հաղորդակցություն կազմակերպել Նախիջևանի և Ադրբեջանի հիմնական տարածքի միջև՝ շրջանցելով Հայաստանը, նշելով, որ հայկական երկաթուղին գտնվում է ռուսական ընկերության կառավարման ներքո: Նրա խոսքով՝ դրա պատճառով «Հայաստանը կորցնում է մրցակցային առավելությունը»:

Հուլիսի 30-ին Փաշինյանը հնարավոր էր համարել Ռուսաստանին 2 մլրդ դոլարի չափով ֆինանսական պահանջներ ներկայացնելը «Հարավկովկասյան երկաթուղի» կոնցեսիայի կոնտեքստում: Նրա խոսքով՝ երկաթուղին Հայաստանի սեփականությունն է, և հանրապետությունն իրավասու է օգտագործել օրենքով նախատեսված ցանկացած մեխանիզմ, ներառյալ արբիտրաժը: Ընդ որում, Փաշինյանը հայտարարել էր, որ Երևանը ակնկալում է հարցը կարգավորել բարեկամական ձևաչափով՝ ռուսական կողմի հետ երկխոսության միջոցով:

Ավելի ուշ նույն օրը «Ռուսական երկաթուղիներ»-ի ղեկավար Օլեգ Բելոզյորովը հայտարարել էր, որ Մոսկվան մտադիր է հավատարիմ մնալ կոնցեսիոն համաձայնագրի պայմաններին և դրա դադարեցման կամ Հայաստանի կողմից փոփոխման դեպքում ակնկալում է կատարված ներդրումների վերադարձ:

Ռուսական կողմի գնահատմամբ՝ կոնցեսիայի գործողության սկզբից Հայաստանի երկաթուղային համակարգում ներդրվել է ավելի քան 30 մլրդ ռուբլի: