Միջազգային վիզիոներները քննարկել են տեխնոլոգիաների ապագան Մոսկվայի ստարտափ-գագաթնաժողովում

ԵՐԵՎԱՆ, 7 հոկտեմբերի․/ԱՌԿԱ/․ Մոսկովյան երկրորդ ստարտափ-գագաթնաժողովի շրջանակում միջազգային վիզիոներները քննարկել են, թե ինչպես են արհեստական բանականությունը, ռոբոտատեխնիկան և առաջնորդության նոր մոտեցումներն ազդելու բիզնեսի և հասարակության վրա:     

Առաջնորդության մասնագետ և բեսթսելերների հեղինակ Ռոբին Շարման, Էքս-Մարսել համալսարանի պրոֆեսոր Կարլո Ռովելին և Terminus Group-ի նախագահ ու արհեստական բանականության գծով տնօրեն Լին Շաոն կիսվել են տեխնոլոգիաների զարգացման և փոփոխվող աշխարհում մարդու դերի վերաբերյալ իրենց տեսլականով: Գագաթնաժողովի կազմակերպիչներն էին Մոսկվայի կառավարությունը և Սբերբանկը: 

Միջազգային վիզիոներները՝ տեխնոլոգիաների ապագայի մասին 

Առաջնորդության մասնագետ և բեսթսելերների հեղինակ Ռոբին Շարման «РБК Стиль»-ի գլխավոր խմբագիր Եվգենի Տիխոնովիչի հետ քննարկել է առաջնորդի դերը արհեստական բանականության դարաշրջանում:

Շարման ներկայացրել է H.U.M.A.N. հայեցակարգը, որը հիմնված է այն գաղափարի վրա, որ որքան շատ տեխնոլոգիաներ են օգտագործվում բիզնեսում, այնքան ավելի մարդկային պետք է մնան առաջնորդները: Նրա կարծիքով՝ արհեստական բանականությունը պետք է օգնի մարդուն, իսկ տեխնոլոգիաները պետք է մնան գործիքներ, այլ ոչ թե փոխարինեն մարդկային որակներին:

Ելույթի գործնական մասում Շարման ստարտափերի հիմնադիրներին կոչ է արել չշփոթել զբաղվածությունը արտադրողականության հետ, հրաժարվել մասնագիտական ժարգոնի չափից ավելի օգտագործումից հօգուտ պատմությունների, կանոնավոր ժամանակ հատկացնել հանգստին ու նոր գաղափարների գեներացմանը և պրակտիկայում կիրառել թվային դետոքս: 

Էքս-Մարսել համալսարանի պրոֆեսոր, օղակային քվանտային գրավիտացիայի հիմնադիրներից Կարլո Ռովելին Մոսկովյան ստարտափ-գագաթնաժողովի շրջանակում պատմել է նոր գաղափարների ստեղծման գործընթացում սխալների և անորոշության դերի մասին: Նրա խոսքով՝ սովորական պատկերացումներից կառչած մնալու ձգտումը կարող է խանգարել առաջընթացին, իսկ նոր գաղափարները ծնվում են կուտակված գիտելիքներից և հայտնիի ու անհայտի սահմանագծին կատարվող աշխատանքից:

Ռոբոտատեխնիկայի և խելացի քաղաքների ապագան գագաթնաժողովում քննարկել է Terminus Group-ի նախագահ և արհեստական բանականության գծով տնօրեն Լին Շաոն: Նա պատմել է ընկերության կողմից իրականացված խելացի քաղաքների նախագծերի մասին և նշել, որ դրանց զարգացման գործում կարևոր դեր կարող են խաղալ ռոբոտները:

Փորձագետի կարծիքով՝ ֆիզիկական արհեստական բանականության զարգացումը պետք է հաշվի առնի ոչ միայն լեզուն և մաթեմատիկան, այլև լատենտ գիտելիքը, առողջ մտածողությունը և ինտուիցիան: Ռոբոտատեխնիկայի զարգացման առանցքային ուղղությունների թվում նա առանձնացրել է աշխարհի ընկալումը, ինքնաէվոլյուցիան և ինքնավարությունը: 

Սբերը ներկայացրել է թվային օգնական տեխնոլոգիական ձեռնարկատերերի համար 

Գագաթնաժողովում Սբերը ներկայացրել է նաև «Co-founder»՝ թվային օգնական սկսնակ տեխնոլոգիական ձեռնարկատերերի համար: Ծառայությունն աշխատում է GigaChat-ի հիման վրա և նախատեսված է այդ թվում բիզնեսում փորձ և ծրագրավորման հմտություններ չունեցող օգտատերերի համար:

«Co-founder»-ն ուղեկցում է օգտատիրոջը տեխնոլոգիական նախագծի ստեղծման տարբեր փուլերում՝ գաղափարի որոնումից և հիպոթեզների ստուգումից մինչև vibe coding–ի յուրացում, GigaStudio-ում նախատիպի մշակում և ներդրողների համար pitch deck–ի նախապատրաստում: Աշխատանքի հետագիծը կառուցվում է անհատապես, իսկ երկխոսությունը լրացնում են տեսադասախոսությունների և վերլուծական նյութերի ընտրանիները:

Արդյունքում օգտատերը պետք է ստանա մշակված նախագիծ, որով կարելի է դիմել ներդրողներին, դրամաշնորհների հայտեր ներկայացնել և իրավաբանորեն ձևակերպել բիզնեսը: 

Ծառայությունում օգտագործվում են Չինաստանի առաջատար համալսարանների, առաջին հերթին՝ Ֆուդանի համալսարանի Կառավարման դպրոցի կրթական նյութերը: Չինացի մասնագետները նաև դրել են օգնականի ուսուցողական տրամաբանության հիմքը: Ծրագիրն անցածները կարող են ստանալ գործընկեր բուհերի, այդ թվում՝ Ֆուդանի պաշտոնական կրթական վկայական:

Սբերբանկի Հեռանկարային ներդրումների կենտրոնի տնօրեն, ավագ փոխնախագահ Ալեքսեյ Կատկովը նշել է, որ վերջին վեց տարվա ընթացքում միանձնյա հիմնադիրների հարաբերակցությունը նոր տեխնոլոգիական ընկերությունների շրջանում գերազանցել է մեկ երրորդը, իսկ տաղանդավոր երիտասարդությունը գաղափարներ է գեներացնում ավելի արագ, քան շուկան հասցնում է գործիքներ տրամադրել դրանց իրականացման համար: Ուստի Սբերը թողարկում է թվային օգնականը որպես «մեկ պատուհան» տեխնոլոգիական ձեռնարկատիրություն մուտք գործելու համար՝ շուկայական հիպոթեզների ստուգումից մինչև կոդի առաջին տողի գրում: 

Այսպիսով, Մոսկովյան երկրորդ ստարտափ-գագաթնաժողովը դարձել է հարթակ միաժամանակ երկարաժամկետ տեխնոլոգիական միտումների քննարկման և գործնական գործիքների ներկայացման համար, որոնք օգնում են ձեռնարկատերերին գաղափարները վերածել գործող նախագծերի: