Արցախի խորհրդարանն ընդունել է 2013 թվականի ԼՂՀ պետբյուջեի նախագիծը

ՍՏԵՓԱՆԱԿԵՐՏ, 27 դեկտեմբերի. /ԱՌԿԱ/. Լեռնային Ղարաբաղի Հանրապետության Ազգային ժողովը նախօրեին վեցերորդ նստաշրջանի վերջին լիագումար նիստում  ընդունեց 2013 թվականի ԼՂՀ պետական բյուջեի նախագիծը և դրան ուղեկցող օրինագծերը, հայտնում է ԼՂՀ մամուլի ծառայությունը։

Ինչպես նիստի ընթացքում հայտնեց ԼՂՀ ֆինանսների և էկոնոմիկայի նախարար Սպարտակ Թևոսյանը, ԼՂՀ պետբյուջեն եկամուտների մասով կկազմի 71 մլրդ 263.9 մլն դրամ, ծախսերի մասով` 72 մլրդ 36.1 մլն դրամ, պակասուրդը կլինի` 772.2 մլն դրամ։

Նիստին ներկա էին ԼՂՀ կառավարության անդամներ և պետական գերատեսչությունների ղեկավարներ` վարչապետ Արա Հարությունյանի գլխավորությամբ, պաշտոնատար այլ անձինք։ -0-