Հայաստանի համար ռուսական գազի գնի բարձրացումը քիչ հավանական է․ ԿԲ
ԵՐԵՎԱՆ, 16 հունիսի․/ԱՌԿԱ/․ Հայաստանի Կենտրոնական բանկը չափազանց քիչ հավանական է համարում հանրապետությանը մատակարարվող ռուսական գազի գնի բարձրացման սցենարը, հայտարարել է ՀՀ ԿԲ նախագահ Մարտին Գալստյանը։
«Հայաստանի համար ռուսական գազի գնի բարձրացման և այլ նմանատիպ ռիսկերի հետ կապված սցենարների հավանականությունը ծայրահեղ փոքր է», — երեքշաբթի օ կայացած մամուլի ասուլիսում ասել է Գալստյանը։
Նրա խոսքով՝ եթե նման սցենար, այնուամենայնիվ, լինի, դա կհանգեցնի գների աճի, կազդի արտադրական գործընթացների վրա և կառաջացնի երկրորդային տնտեսական հետևանքներ։
ԿԲ ղեկավարը նշել է, որ կարգավորողը չի տիրապետում գազի գնի հնարավոր բարձրացմանը կանխարգելիչ արձագանքման գործիքների։
«Անհնար է որևէ կանխարգելիչ միջոց ձեռնարկել նման որոշման նկատմամբ։ Համապատասխան փոփոխությունների դեպքում քայլեր կձեռնարկվեն արդեն պոստֆակտում՝ տնտեսության վրա դրանց ազդեցության գնահատումից հետո», — պարզաբանել է Գալստյանը։
Նա հավելել է, որ Կենտրոնական բանկը կհետևի իրավիճակի զարգացմանը և անհրաժեշտության դեպքում կգնահատի հետևանքները գնաճի և մակրոտնտեսական միջավայրի համար։
«Գազպրոմ Արմենիա» ՓԲԸ-ն ռուսական «Գազպրոմ» հոլդինգի 100%-անոց դուստր ձեռնարկությունն է, որը հանդիսանում է ներքին սպառման համար Ռուսաստանից Հայաստան բնական գազի մենաշնորհային մատակարարը։
Այսօրվա դրությամբ սահմանին Հայաստանի համար ռուսական գազի գինը կազմում է $165՝ 1 հազար խորանարդ մետրի դիմաց։ Այս գինը գործում է 2019 թվականի հունվարի 1-ից և, համաձայն գործող հայ-ռուսական համաձայնագրերի, չպետք է փոխվի մինչև 2031 թվականի վերջը։
