Դեպի ՌԴ հայկական արտադրանքի արտահանման հետ կապված դժվարությունները տնտեսական կապերի հնարավոր խզման հետևանք են․ ՌԴ ԱԳՆ

ԵՐԵՎԱՆ, 7 օգոստոսի․/ԱՌԿԱ/․ Հայկական արտադրանքի արտահանման հետ կապված դժվարությունները կապված չեն ռուսական սահմանափակումների հետ, այլ ավանդական տնտեսական կապերի հնարավոր խզման հետևանք են: Այս մասին, ինչպես հաղորդում է РБК-ն, հայտարարել է Ռուսաստանի ԱԳՆ տեղեկատվության և մամուլի դեպարտամենտի փոխտնօրեն Ալեքսեյ Ֆադեևը:

«Պետք է հասկանալ, որ սրանք մեր սահմանափակումները չեն, սա իրականությունն է, որը սպասում է հանրապետությանն ավանդական կապերի խզման դեպքում: Եվ մենք բազմիցս կոչ ենք արել հայկական ղեկավարությանն ազնվորեն խոսել դեպի ԵՄ նման վերակողմնորոշման բոլոր դրական և բացասական կողմերի մասին», — ասել է նա:

Ֆադեևի խոսքով՝ Հայաստանի իշխանություններն առաջացող խնդիրները ներկայացնում են որպես Մոսկվայի կողմից սահմանափակումներ՝ միևնույն ժամանակ քաղաքացիներից թաքցնելով Եվրամիության հետ մերձեցման ուղղության սոցիալ-տնտեսական հետևանքները:

«Եթե «դիվերսիֆիկացիա» գեղեցիկ բառի հետևում թաքցվի շրջադարձը եվրասիական ինտեգրումից և ավանդական դաշնակցից դեպի Ռուսաստանին բացահայտ թշնամաբար տրամադրված Եվրամիություն, առավել ևս Ռուսաստանի հետ ուղղակի բախումից հետո, ապա դա ոչ միայն եվրասիական ինտեգրման գործընկերների, այլև սեփական բնակչության բացահայտ խաբեություն է», — նշել է Ֆադեևը:

Դեպի Ռուսաստան հայկական արտադրանքի մատակարարումների սահմանափակումների մասին

Ռուսաստանը մայիսի վերջից փուլ առ փուլ սահմանափակումներ է մտցնում Հայաստանից մի շարք ապրանքատեսակների մատակարարումների վրա՝ դա բացատրելով բուսասանիտարական պահանջների խախտումներով: Սահմանափակումների տակ են հայտնվել ծաղկային արտադրանքը, հանքային ջուրը և ալկոհոլային արտադրանքի որոշ տեսակներ, բանջարեղենը, միրգը, հատապտուղները, խաղողը, կարտոֆիլը, չորացրած մրգերը, ավելի ուշ՝ կենդանի ձուկն ու ձկնամթերքը, իսկ հուլիսի 27-ից՝ կաթնամթերքը:

Օգոստոսի 4-ին հայտնի դարձավ ՌԴ-ում «ԲՋՆԻ» և «Просто Азбука» խմելու ջրի (այդ թվում՝ մանկական), DARBAS ապրանքանիշի ոչ ալկոհոլային Մոխիտոյի ավելի քան 70 հազար շշի վաճառքի կասեցման մասին:

Սահմանափակումները ներառում են նաև Ռուսաստանի տարածքով հայկական ծագման արտադրանքի տարանցման արգելքը դեպի ԵԱՏՄ այլ երկրներ:

Ընթացիկ տարվա օգոստոսի սկզբին ՀՀ Կենտրոնական բանկի նախագահի տեղակալ Հովհաննես Խաչատրյանը հայտարարել էր, որ դեպի Ռուսաստան հայկական ապրանքների արտահանման կրճատման կամ դադարեցման դեպքում վտանգի տակ կարող է հայտնվել Հայաստանի տնտեսության մի մասը, որը համապատասխանում է ՀՆԱ-ի մոտ 1,5–2%-ին: