Փաշինյանը հաստատել է Հայաստանի երկաթուղու կոնցեսիոն մոդելը փոխելու պլանները
ԵՐԵՎԱՆ, 27 մայիսի․/ԱՌԿԱ/․ ՀՀ վարչապետ Նիկոլ Փաշինյանը կրկին հայտարարել է երկաթուղու կոնցեսիոն կառավարման տրամաբանությունը փոխելու մտադրության մասին, որպեսզի «պատժամիջոցային խոչընդոտները խնդիր չդառնան երկրի երկաթուղային համակարգի զարգացման համար։
2008 թ․-ից 30 տարի ժամկետով հայկական երկաթուղու կոնցեսիոները «Հարավկովկասյան երկաթուղի» (ՀԿԵ) ՓԲԸ-ն է, որը «Ռուսական երկաթուղիներ» (ՌԵ) ԲԲԸ-ի դուստր ընկերությունն է։
«Հայաստանում արդեն կա պատրաստի երկաթուղի, և հենց դա է պետք օգտագործել»,- չորեքշաբթի Կոտայքի մարզի Գողթ բնակավայրի բնակիչների հետ նախընտրական հանդիպման ժամանակ հայտարարել է Փաշինյանը։
Նրա խոսքով՝ ուսումնասիրությունների արդյունքում կառավարությունը եկել է այն եզրակացության, որ խնդիրը կապված է Հայաստանի երկաթուղու կոնցեսիոն կառավարման ներկայիս մոդելի հետ։
« Քանի որ Հայաստանի երկաթուղին ռուսական կոնցեսիայի ներքո է, և Ռուսաստանը բարդ պատժամիջոցային հարաբերություններ ունի Արևմուտքի երկրների հետ, արևմտյան երկրները փնտրում են ճանապարհներ, թե ոնց շրջանցեն դա»,- նշել է Փաշինյանը։
Վարչապետն ընդգծել է, որ միջազգային ընկերությունները փորձում են խուսափել պատժամիջոցների ռիսկից և փնտրում են անվտանգ ուղիներ։
Փաշինյանը նաև հայտարարել է, որ հաջորդ փուլով ակնկալվում է հայ-թուրքական սահմանի և երկաթուղու բացումը։
«Ամեն դեպքում, արևելքից արևմուտք ապրանքների հոսքն այնքան մեծ է, որ ես վստահ եմ՝ մեր երկաթուղին աշխատելու է բարձր ծանրաբեռնվածությամբ և մեծ գումարներ է բերելու ՀՀ-ին»,- ասել է Փաշինյանը։
Ավելի վաղ նա հայտարարել էր, որ Հայաստանը մտադիր չէ որևէ քայլ ձեռնարկել Ռուսաստանի թիկունքում կամ նրան հակառակ՝ հայկական երկաթուղիների կոնցեսիան Ղազախստանին հնարավոր փոխանցման հարցում։
Հայաստանի երկաթուղային պլանների մասին
2026 թ․-ի փետրվարին Փաշինյանը չի բացառել, որ Ռուսաստանը կարող է հայկական երկաթուղիների կառավարման իրավունքը վաճառել մեկ այլ երկրի, որը բարեկամական է թե՛ Հայաստանի, թե՛ Ռուսաստանի համար, մասնավորապես՝ Քաթարին, ԱՄԷ-ին կամ Ղազախստանին։ Փաշինյանը հայտարարեց, որ TRIPP նախագծի շրջանակում մի շարք երկրներ առաջարկում են երկաթուղային հաղորդակցություն հաստատել Նախիջևանի և Ադրբեջանի հիմնական տարածքի միջև՝ շրջանցելով Հայաստանը, և մատնանշում են այն փաստը, որ հայկական երկաթուղին գտնվում է ռուսական ընկերության կառավարման ներքո։ Նրա խոսքով՝ Ռուսաստանի կողմից հայկական երկաթուղու կառավարման պատճառով «Հայաստանը կորցնում է մրցակցային առավելությունը»։
Ավելի ուշ Փաշինյանն ասել է, որ ՌԴ նախագահ Վլադիմիր Պուտինի հետ քննարկել է Հայաստանում երկաթուղու հարցը։ Նրա խոսքով՝ այդ ուղղությամբ աշխատանքները շարունակվում են։
Ապրիլի 2-ին Ռուսաստանի փոխվարչապետ Օվերչուկը հայտարարել է, որ ռուսական կողմը Հայաստանի երկաթուղիների նկատմամբ ՌԴ կոնցեսիայի հնարավոր փոխանցման մասին պատմությանը տեղեկացել է այլ պետությունների գործընկերներից, և Մոսկվայի հետ ուղղակիորեն ոչ ոք նման խոսակցություն չի վարել։
Ապրիլի 7-ին Ղազախստանի տրանսպորտի նախարարությունը և «Ղազախստան Տեմիր Ժոլի» (ՂՏԺ) ԲԲԸ-ն հայտարարել են, որ բանակցություններ չեն վարում հայկական երկաթուղիների ռուսական կոնցեսիան ձեռք բերելու շուրջ։
