ՎԶԵԲ-ը նպատակաուղղված է աջակցել Հայաստանին առավել կայուն զարգացման հասնելու գործում
ԵՐԵՎԱՆ, 12 մայիսի. /ԱՌԿԱ/. ՎԶԵԲ-ի հետ Հայաստանի համագործակցության հաջորդ փուլն ուղղված կլինի ազդեցության խորացմանը և երկրին աջակցելուն ոչ միայն աճի ապահովման, այլև առավել կայուն, ներառական և հաստատուն զարգացման հասնելու գործում։ Այս մասին «ԱՌԿԱ» գործակալությանը տված հարցազրույցում հայտարարել է Թուրքիայի և Կովկասի հարցերով բանկի գործադիր տնօրեն Էլիզաբեթա Ֆալչետտին:
Նրա խոսքով՝ փոխգործակցության կենտրոնական ուղղություններից մեկը կմնա տարածաշրջանային կապակցվածությունը, քանի որ Հայաստանը ձգտում է ամրապնդել իր դերը տարածաշրջանային առևտրի և ինտեգրման գործընթացներում։
«Մենք կենտրոնանալու ենք տրանսպորտային, էներգետիկ և թվային ենթակառուցվածքներում ներդրումների խթանման վրա՝ երկրի դիմակայունությունն ու դիրքերը ավելի լայն տարածաշրջանային միջանցքներում ամրապնդելու նպատակով»,-ասել է նա։
Ֆալչետտին նշել է, որ ջրամատակարարումը շարունակում է մնալ հիմնական առաջնահերթությունների շարքում, միևնույն ժամանակ աճում է ուշադրությունը կանաչ և կայուն քաղաքային զարգացման խթանման հանդեպ՝ հատկապես համայնքային ներդրումների միջոցով։
«Կայուն ենթակառուցվածքների զարգացմանը զուգահեռ՝ մենք առանձնահատուկ կարևորում ենք ներառական և մրցունակ մասնավոր հատվածի զարգացումը, այդ թվում՝ կանանց, երիտասարդների, փախստականների և ընդունող համայնքների նպատակային աջակցությունը»,-պարզաբանել է նա։
Դրան զուգահեռ, ինչպես նշել է Ֆալչետտին, կշարունակեն աջակցել այն բարեփոխումներին, որոնք ընդլայնում են կապիտալի շուկաները, բարելավում կառավարումը և նպաստում ավելի կանխատեսելի ու թափանցիկ գործարար միջավայրի ձևավորմանը։
ՎԶԵԲ-ը Հայաստանի առաջատար ինստիտուցիոնալ ներդրողներից է: Այսօրվա դրությամբ ֆինանսավորման ծավալը գերազանցել է 3 միլիարդ եվրոն՝ 245 նախագծերի շրջանակում, ընդ որում միջոցների ավելի քան 85%-ն ուղղվել է մասնավոր հատվածին:
Հարցազրույցի ամբողջական տարբերակին կարելի է ծանոթանալ հղումով:
