ՀՀ ֆինանսների նախարարությունը համարում է, որ դեռ վաղ է խոսել ԵՄ օֆշորային երկրների «սև ցուցակում» Հայաստանի ընդգրկման մասին
ԵՐԵՎԱՆ, 28 նոյեմբերի. /ԱՌԿԱ/. Օրերս Bloomberg գործակալությունը հայտնեց Հայաստանը Եվրամիության` օֆշորային երկրների այսպես կոչված «սև ցուցակ» ներառելու հավանականության մասին։ Ցուցակում կարող է ներառվել ընդհանուր առմամբ 36 պետություն, այդ թվում` Պանաման, Թունիսը, Թուրքիան և Մարշալյան կղզիները։ Հարկային ոլորտում այսպես կոչված «Վարքագծի նորմերի հանձնաժողովը» կարող է խորհուրդ տալ ԵՄ երկրների ֆինանսների նախարարներին դեկտեմբերի 5–ին «սև ցուցակում» ներառել այն երկրները, որոնք չեն համագործակցում հարկերի վճարումից խուսափելու դեմ պայքարում։ Bloomberg–ը նշում է, որ ԵՄ–ում դեռ չեն որոշել, թե ինչ պատժամիջոցներ կարող են կիրառվել այդ ցանկի երկրների նկատմամբ։
ՀՀ ֆինանսների նախարարության Միջազգային հարկային և մաքսային հարաբերությունների բաժին պետ Նաիրուհի Ավետիսյանը «ԱՌԿԱ» գործակալությանը մեկնաբանել է ԵՄ–ի «սև ցուցակում» Հայաստանն ընդգրկելու հնարավորությունը։
«ԱՌԿԱ». ունի՞ արդյուք Հայաստանը օֆշորային սև ցուոցակում ներգրավելու նախադրյալներ, և որքա՞ն է դա հավանական։
Ն. Ավետիսյան. Հայաստանի Հանրապետությունը 2017 թվականի հունվարից ԵՄ Խորհրդի Վարքի կանոնագրքի (Բիզնես հարկեր) խմբի փորձագետների հետ գտնվում է ակտիվ երկխոսության մեջ: Մասնավորապես, ԵՄ Խորհրդի Վարքի կանոնագրքի (Բիզնես հարկեր) խմբի կողմից ներկայացված հարցադրումների վերաբերյալ տրամադրվել են սպառիչ պատասխաններ: Միևնույն ժամանակ, սահմանվել են իրատեսական ժամկետներ՝ անհրաժեշտության դեպքում առկա անհամապատասխանությունները ԵՄ Խորհրդի Վարքի կանոնագրքի (Բիզնես հարկեր) խմբի կողմից սահմանված չափանիշներին համապատասխանեցնելու համար: Հետևաբար, Եվրոպական Միության անդամ պետությունների հետ չհամագործակցող երկրների ցանկում հայտնվելու, առավել ևս դրանից բխող պատժամիջոցների մասին դեռևս վաղ է խոսել:
«ԱՌԿԱ». ֆինանսական թափանցիկության ի՞նչ մակարդակ ունի Հայաստանը։
Ն. Ավետիսյան. նշված հարցի վերաբերյալ գնահատականների տրամադրումը դուրս է ՀՀ ֆինանսների նախարարության իրավասությունների շրջանակներից: Թերևս հարցը կարելի է ուղղել ՀՀ կենտրոնական բանկին: Ինչ վերաբերում է հարկման նպատակով թափանցիկությանը, ապա Հայաստանի Հանրապետությունը հանդիսանում է Տնտեսական համագործակցության զարգացման կազմակերպության հարկման նպատակով թափանցիկության և տեղեկությունների փոխանակման Գլոբալ ֆորումի անդամ, որի անդամ ենաշխարհի շուրջ 147 երկրներ: Բնականաբար, Գլոբալ ֆորումին անդամակցությունը ենթադրում է, որ Հայաստանի Հանրապետությունը համապատասխանում է այս փուլում Գլոբալ ֆորումի կողմից պարտադիր համարվող՝ հարկման նպատակով թափանցիկության և տեղեկությունների փոխանակման միջազգային ստանդարտներին: Այնուամենայնիվ, նշված գործընթացը կրում է շարունակական բնույթ և ներկայումս աշխատանքներ են իրականացվում տեղեկությունների փոխանակման ավտոմատ ստանդարտին միանալու համար: Միաժամանակ, Հայաստանի Հանրապետությունը անդամակցում է մի շարք պայմանագրերի, որոնց շրջանակներում իրականացվում է տեղեկատվության փոխանակում՝ ընդունված միջազգային ստանդարտներին համապատասխան:
«ԱՌԿԱ». հարկման ոլորտի ի՞նչ միջազգային պարտավորություններ է կատարում Հայաստանը և որքանո՞վ է պահպանում դրանք։
Ն. Ավետիսյան. Հայաստանի Հանրապետությունըշն ակտիվորեն ներգրավված է միջազգային հարկային հարաբերություններում, ընդ որում թե երկկողմ, թե բազմակողմ մակարդակներում:
Մասնավորապես, Հայաստանի Հանրապետությունն հարկային համագործակցության ոլորտում ունի բազմաթիվ համաձայնագրերը, որոնք կարգավորում են թե հարկային քաղաքականությանն, թե հարկային վարչարարությանն առնչվող հարցեր: Նշենք, որ միջազգային հարկային համագործակցության ոլորտում Հայաստանի Հանրապետության և այլ երկրների միջև երբևէ խնդիրներ չեն արձանագրվել: ՀՀ հանդիսանում է նաև Տնտեսական համագործակցության զարգացման կազմակերպության հարկման նպատակով թափանցիկության և տեղեկությունների փոխանակման Գլոբալ ֆորումի անդամ: Չհանդիսանալով Հարկման բազայի քայքայումը և շահույթի տեղափոխումը (BEPS) ծրագրի անդամ՝ ակտիվորեն մասնակցում է BEPS ծրագրի միջոցառումներին և առաջիկայում նախատեսվում է BEPS ծրագրի որոշ գործողություններ տեղայնացնել ՀՀ հարկային օրենսդրության մեջ: Ի դեպ, միջազգային հարկային քաղաքականության ժամանակակից միտումներից բխող միջոցառումներն ամրագրված են նաև ՀՀ կառավարության 2017-2022 թվականների ծրագրով:–0–
