Զախարովա. Լաչինի միջանցքում ստեղծված իրավիճակը ՀՀ-ի կողմից Լեռնային Ղարաբաղն Ադրբեջանի մաս ճանաչելու հետևանք է

ԵՐԵՎԱՆ, 31 օգոստոսի./ԱՌԿԱ/. Լաչինի միջանցքում ստեղծված իրավիճակը ՀՀ-ի կողմից Լեռնային Ղարաբաղն Ադրբեջանի մաս ճանաչելու հետևանք է, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան այսօր ճեպազրույցի ժամանակ՝ պատասպանելով Լաչինի միջանցքում Ադրբեջանի կողմից երեք հայ ուսանողներին ձերբակալելու մասին հարցին:

«Դա արձանագրվել է երկու երկրների առաջնորդների մասնակցությամբ Եվրամիության հովանու ներքո 2022թ.-ի հոկտեմբերին և 2023թ.-ի մայիսին անցկացված գագաթնաժողովների արդյունքում», - ասել է նա:

Զախարովան նաև ընդգծել է, որ դրա մասին հստակ ասվում է ՌԴ ԱԳՆ հուլիսի 15-ի հայտարարության մեջ, որը վերաբերումէ ԼՂ-ում տիրող իրավիճակին:

«Այս համատեքստում անտեղի, սխալ, չարդարացված ենք համարում պատասխանատվությունը ռուսական խաղաղապահ զորակազմի վրա բարդելը, զորակազմի խնդիրը տեսնում ենք նրանում, որ այն նոր պայմաններում, որ ձևավորվել են Երևանի և Հայաստանի իշխանությունների կողմից ԼՂ-ն Ադրբեջանի պատկանելիության ճանաչման արդյունքում, «տեղում» ցուցաբերել հնարավորինս աջակցություն Ղարաբաղի հայերի իրավունքների և անվտանգության ապահովման գործում, այդ թվում՝ Բաքու-Ստեփանակերտ ուղիղ երկխոսության համատեքստում», - հայտարարել է նա:

Օգոստոսի 28-ին Արցախի մարդու իրավունքների պաշտպանը հայտնել էր, որ օգոստոսի 28-ին ռուսական խաղաղապահ զորակազմի ուղեկցությամբ իրականացվել է Արցախից Հայաստան քաղաքացիական անձանց հերթական տեղափոխումը։ Ըստ նախնական տեղեկությունների՝ խաղաղապահ զորակազմի ուղեկցությամբ իրականացվել է 170 անձանց տեղափոխություն։

Ժամը 13:00-ի սահմաններում դեպի Հայաստան տեղափոխվող անձինք հասել են Լաչինի միջանցքում՝ Հակարի կամրջի մոտ, տեղակայված ադրբեջանական անօրինական անցակետ։

Մարդու իրավունքների պաշտպանի աշխատակազմի կողմից ձեռք բերված տեղեկատվության համաձայն՝ 2001 թվականի ծնված Ալեն Նելսոնի Սարգսյանն ադրբեջանական սահմանապահ և այլ ծառայությունների ներկայացուցիչների կողմից ուժի և հարկադրանքի կիրառմամբ առևանգվել և տարվել է անհայտ ուղղությամբ։

Բացի դրանից, Արցախից ՀՀ տեղափոխվող անձանցից ևս հինգ հոգու Ադրբեջանի սահմանապահ և այլ ծառայությունների ներկայացուցիչները տարել են անցակետի մոտ տեղադրված հատուկ սենյակ՝ հարցաքննելու։ Հարցաքննության ընթացքում տվել են տարաբնույթ հարցեր՝ սպորտով զբաղվածությունը, ՀՀ գնալու նպատակը, Հայաստանում և Արցախում տնտեսական իրավիճակը և այլն։

Ձեռք բերված տեղեկությունների համաձայն՝ նախօրոք համաձայնեցված ցուցակներում առկա անձանցից ևս երկու հոգի՝ Վահե Հովսեփյանը և Լևոն Գրիգորյանը չեն հատել անօրինական անցակետը, սակայն չի հաջողվում նրանց հետ կապ հաստատել։
Երեք քաղաքացիներն էլ Հայաստանի Հանրապետության ուսումնական հաստատությունների ուսանողներ են։-0-