ԵԱՀԿ դիտարկումը Ղարաբաղի շփման գծում անցել է առանց միջադեպերի
ՍՏԵՓԱՆԱԿԵՐՏ, 5 հոկտեմբերի. /ԱՌԿԱ/. ԼՂՀ իշխանությունների հետ ձեռք բերված պայմանավորվածության համաձայն չորեքշաբթի անցկացված ԵԱՀԿ առաքելության դիտարկումը Լեռնային Ղարաբաղի և Ադրբեջանի զինված ուժերի շփման գծում անցել է առանց միջադեպերի:
Ինչպես հաղորդում է ԼՂՀ ԱԳՆ մամուլի ծառայությունը, Ղարաբաղի և Ադրբեջանի զինված ուժերի շփման գծի պլանային դիտարկումը անցկացվել է Շահումյանի շրջանի Գյուլիստան գյուղի հարավային ուղղությամբ:
ԼՂՀ պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցչի դաշտային օգնական Գենադիե Պետրիկան (Մոլդովա), ԳՆԱՆ անձնական օգնական Սայմոն Թիլլերը (Մեծ Բրիտանիա) և ԵԱՀԿ նախագահության ներկայացուցիչ, Գերմանիայի արտաքին գործերի նախարարության աշխատակից Կլաուս Քելլերը:
Շփման գծի հակառակ կողմից դիտարկումն իրականացրել են ԵԱՀԿ գործող նախագահի անձնական ներկայացուցիչ դեսպան Անջեյ Կասպշիկը, նրա դաշտային օգնական Խրիստո Խրիստովը (Բուլղարիա) և ԵԱՀԿ ԳՆԱՆ գրասենյակի աշխատակից Պետեր Սվեդբերգը (Շվեդիա)։
«Դիտարկումն անցել է ըստ նախատեսված ժամանակացույցի, կրակի դադարեցման ռեժիմի խախտումներ չեն արձանագրվել: Դիտարկման առաքելությանը ղարաբաղյան կողմից ուղեկցել են ԼՂՀ արտաքին գործերի նախարարության և պաշտպանության նախարարության ներկայացուցիչները», - նշվում է հաղորդագրության մեջ: -0-
