Ադրբեջանական սադրանքներն ուղղված են Արցախի շուրջ բանակցություններում լրացուցիչ խոչընդոտների ստեղծմանը. Նալբանդյան

ԵՐԵՎԱՆ, 22 հունվարի. /ԱՌԿԱ/. Շփման գծում ադրբեջանական սադրանքները ուղղված են ղարաբաղյան կարգավորման գործընթացում լրացուցիչ խոչընդոտների ստեղծմանը, չորեքշաբթի հրավիրված ասուլիսի ժամանակ ասաց Հայաստանի արտաքին գործերի նախարար Էդվարդ Նալբանդյանը։

Հունվարի 19-ի լույս 20-ի գիշերն ադրբեջանական ԶՈՒ–ն դիվերսիոն խմբերի կողմից  Լեռնային Ղարաբաղի Հանրապետության տարածք մուտք գործելու անհաջող փորձեր են կատարել, բայց ետ են շպրտվել ելքային դիրքեր` կորուստներ կրելով։ Փոխհրաձգությունում զոհվել է ԼՂՀ Պաշտպանության բանակի կրտսեր սերժանտ Արմեն Հովհաննիսյանը։ ԼՂՀ պետական սահմանը պաշտպանելիս ցուցաբերած խիզախության համար Հովհաննիսյանը ետմահու պարգևատրվել է «Խիզախության համար» մեդալով։

«Նման սադրանքներն ուղղված են բանակցային գործընթացում լրացուցիչ խոչընդոտների ստեղծմանը»,– հայտարարեց Նալբանդյանը։

ԱԳՆ ղեկավարը նշեց, որ այդ հարցին անդրադարձ է կատարվել երեկ երեկոյան` Հարավային Կովկասում և Վրաստանում ճգնաժամի հարցերով ԵՄ հատուկ ներկայացուցիչ Ֆիլիպ Լեֆորի հետ հանդիպման ընթացքում։

«Սակայն բանակցությունները պետք է շարունակել։ Այլընտրանք չկա»,– ընդգծեց նա։

Նալբանդյանն ընդգծեց, որ ԵԱՀԿ Մինսկի խմբի կողմից ներկայացրած հիմնական սկզբունքները` ուժի չկիրառման սկզբունքն ու դրա կիրառման սպառնալիքները, ժողովուրդների ինքնորոշման իրավունքը և տարածքային ամբողջականության սկզբունքը, մնում են բանակցությունների սեղանին։  

«Ի տարբերություն Ադրբեջանի` Հայաստանը բազմիցս հաստատել է, որ հավատարիմ է այդ սկզբունքներին։ Իսկ ադրբեջանական կողմը շարունակում է ինչպես այդ սկզբունքների, այնպես էլ համանախագահների հորդորներն անտեսելու անհաջող փորձերը։ Ադրբեջանը փորձում է ամեն ինչ գլխիվայր շուռ տալ` պատրանքներ ստեղծելով սեփական ժողովրդի համար»,– ասաց Նալբանդյանը։

Նալբանդյանը հիշեցրեց նաև, որ հունվարի 22–ին մեկնում է Փարիզ, որտեղ կկայանա ԵԱՀԿ ՄԽ համանախագահների հետ հանդիպումը, իսկ հունվարի 24–ին` հանդիպում Ադրբեջանի ԱԳՆ ղեկավար Էլմար Մամեդյարովի հետ։ -0-