ՀՀ նախագահը ցավակցություն է հայտնել Հռոմի Պապին` Նորին Սրբության հարազատների ողբերգական մահվան կապակցությամբ
ԵՐԵՎԱՆ, 21 օգոստոսի. /ԱՌԿԱ/. ՀՀ նախագահ Սերժ Սարգսյանը հինգշաբթի ցավակցական հեռագիր է հղել Նորին Սրբություն Հռոմի Պապ Ֆրանցիսկոսին՝ ողբերգական ավտովթարի զոհ դարձած Նորին Սրբության հարազատների՝ եղբորորդու կնոջ և նրա երկու անչափահաս զավակների մահվան կապակցությամբ, հաղորդում է ՀՀ նախագահի մամուլի ծառայությունը:
«Ձեր ընտանիքի անդամների անդառնալի կորստյան կապակցությամբ անկեղծորեն ցավակցում եմ Ձեզ, կիսում Ձեր վիշտը և միանում Ձեր աղոթքին առ Աստված՝ ի լուսավորություն նրանց հոգիների»,-ասված է ՀՀ նախագահի ցավակցական հեռագրում։
Երկուշաբթի լույս երեքշաբթի գիշերը Ջեյմս Կրեյկ քաղաքի մոտակայքում՝ Բուենոս Այրես քաղաքից 550 կմ դեպի հյուսիս, Chevrolet Spin մակնիշի ավտոմեքենան բախվել է բեռնատարին: Ավտոմեքենայում են գտնվել Պապի հարազատները: Ավտովթարի հետևանքով զոհվել են Հռոմի Պապի եղբորորդու 36-ամյա կինն և նրա երկու անչափահաս զավակները, որոնցից մեկը ութ ամսական էր, իսկ մյուսը՝ երկու տարեկան: Հռոմի Պապի 38-ամյա եղբորորդին, ով գտնվում էր մեքենայի ղեկին, ծանր վիճակում տեղափոխվել է հիվանդանոց: -0-
Ծանոթացեք լուրերին առաջինն ու քննարկեք դրանք մեր Telegram-ում
13:50 21.08.2014
