Գյուղնախարարությունը ցրտահարության վնասների մասին խոսելը վաղաժամ է համարում

ԵՐԵՎԱՆ, 31 մարտի. /ԱՌԿԱ/.  Անբարենպաստ եղանակային պայմանների հետևանքով վնասների չափի մասին խոսելը դեռևս վաղաժամ է, հայտնում է հանրապետության գյուղատնտեսության նախարարության մամուլի ծառայությունը։ 

Կիրակի` մարտի 30–ին, հանրապետության գրեթե ողջ տարածքում առատ ձյուն է տեղացել, որն ուղեկցվել է ուժեղ քամով։ Օդի ջերմաստիճանը նվազել է 10-12 աստիճանով։ Երևանում ձյան ծածկույթի բարձրությունը կազմել էր շուրջ 30-40 սմ։ Վատ եղանակը հանգեցրել էր էլեկտրամատակարարման խափանումների։ 

«Ներկայում նախարարության կողմից ստեղծված մասնագիտական խմբերն ուսումնասիրում են և առաջիկայում կներկայացնեն պաշտոնական տեղեկատվություն վնասի նախնական չափերի մասին: Մանավանդ, որ առաջիկա երկու գիշերների ընթացքում ցրտահարության վտանգը դեռևս պահպանվում է»,– ասվում է հաղորդագրության մեջ։ 

ՀՀ գյուղատնտեսության նախարարությունը կրկին հորդորում է գյուղացիական տնտեսություններին առանց խուճապի և հետևողականորեն շարունակել աշխատանքները, հատկապես` ջերմոցային տնտեսություններում և պոլիէթիլենային ծածկերի տակ գտնվող բերքն ու սածիլները փրկելու ուղղությամբ: -0-