ԱԳՆ-ն մանրամասնել է, թե երբ ուժի մեջ կմտնի Հայաստանի և Վրաստանի միջև ID քարտով ճամփորդելու հնարավորությունը
ԵՐԵՎԱՆ, 4 մարտի./Նովոստի-Արմենիա/. Այսօր հայտնի է դարձել ՀՀ վարչապետ Նիկոլ Փաշինյանի՝ Վրաստան պաշտոնական այցի շրջանակում ձեռք բերված պայմանավորվածության մասին, որը վերաբերում է Հայաստանի և Վրաստանի միջև մուտքի ռեժիմի ընթացակարգերի դյուրացմանը, խոսքը մասնավորապես նույնականացման քարտերով ճամփորդելու հնարավորության մասին է:
ՀՀ ԱԳՆ-ն մանրամասնել է, թե երբ է ակնկալվում վերոնշյալ պայմանավորվածության ուժի մեջ մտնելը:
«Ինչպես տեղեկացրել ենք, երեկ Հայաստանի և Վրաստանի ԱԳ նախարարների կողմից ընդգծվել է մարդկանց միջև շփումների խրախուսման և հասարակությունների միջև կապերի ամրապնդման կարևորությունը և այդ առնչությամբ ստորագրվել է մտադրությունների հուշագիր»,- նշվում է ԱԳՆ հաղորդագրության մեւ:
Նշվում է, որ մտադրությունների հուշագրի ստորագրմամբ հիմք է տրվում համապատասխան երկկողմ միջազգային պայմանագրի կնքման շուրջ բանակցությունների մեկնարկին:
«Պայմանագրի կնքման և ուժի մեջ մտնելու գործընթացի տարբեր փուլերում, օրենսդրության համապատասխան, կապահովվի հանրության պատշաճ իրազեկումը»,- նշում են գերատեսչությունից։-0-
