Այսօրվանից վերսկսվում են Կապան–Երևան–Կապան թռիչքները
ԵՐԵՎԱՆ, 31 մարտի․/ԱՌԿԱ/․ Այսօրվանից վերսկսվում են Կապան–Երևան–Կապան թռիչքները, հայտնել է տարածքային կառավարման և ենթակառուցվածքների նախարար Դավիթ Խուդաթյանը Facebook–յան իր էջում։
Նա հայտնել է, որ թռիչքները կիրականացվեն շաբաթը 5 օր հաճախականությամբ։
«Սյունիք» օդանավակայանի և Երևան-Կապան չվերթի մասին
Շուրջ 30 տարի չգործող «Սյունիք» օդանավակայանը նախկինում վերանորոգվել էր միջազգային չափանիշներին համապատասխան և 2020 թվականին սերտիֆիկացվել Հայաստանի Քաղաքացիական ավիացիայի կոմիտեի կողմից, իսկ 2023 թվականի սեպտեմբերին Օդային տրանսպորտի միջազգային ասոցիացիայի (IATA) կողմից ստացել է եռանիշ կոդ (նույնացուցիչ)՝ YUK:
2023 թվականի օգոստոսի 21-ին NorAir ավիաընկերությունը գործարկեց Երևան-Կապան-Երևան կանոնավոր չվերթեր։ Մեկ ուղղությամբ տոմսի արժեքը կազմում էր 20 հազար դրամ (մոտ $50)։
2025 թվականի սեպտեմբերի 3-ից Երևանի և Կապանի միջև չվերթերը ժամանակավորապես դադարեցվել էին՝ օդանավի տեխնիկական սպասարկում իրականացնելու նպատակով՝ թռիչքների անվտանգությունն ու հարմարավետությունն ապահովելու համար։
