ԱՄԷ արտահանվել է 60 տոննա հայկական ձուկ և ձկնամթերք. ՍԱՏՄ
ԵՐԵՎԱՆ, 2 սեպտեմբերի․/ԱՌԿԱ/. Արաբական Միացյալ Էմիրություններ (ԱՄԷ) է արտահանվել է 60 տոննա հայկական ձուկ և ձկնամթերք, հայտնում է ՀՀ Սննդամթերքի անվտանգության տեսչական մարմինը։
«Հաշվի առնելով այդ երկրի շուկայում առկա մեծ պահանջարկը՝ Սննդամթերքի անվտանգության տեսչական մարմինը կապահովի ձկնաբուծությամբ և արտահանմամբ զբաղվող բոլոր շահագրգիռ ընկերությունների կապը ԱՄԷ արտահանող կազմակերպության հետ՝ հետագա համագործակցության համար», - նշված է հաղորդագրության մեջ:
Պահանջվող խմբաքանակներն են՝ իշխան ձուկ, քաշը 4 կգ և ավելի, որը կհամապատասխանի անվտանգության սահմանված պահանջներին։
Դեպի ՌԴ հայկական արտադրանքի մատակարարումների սահմանափակումների մասին
Ռուսաստանը մայիսի վերջից փուլ առ փուլ սահմանափակումներ է մտցրել Հայաստանից մի շարք ապրանքատեսակների մատակարարումների վրա՝ դա պատճառաբանելով բուսասանիտարական պահանջների խախտումներով: Սահմանափակումների ներքո են հայտնվել ծաղկային արտադրանքը, հանքային ջուրը, որոշ ըմպելիքներ և ալկոհոլային արտադրանքի որոշ տեսակներ, բանջարեղենը, մրգերը, հատապտուղները, խաղողը, կարտոֆիլը, չորամրգերը, ավելի ուշ՝ թարմ ձուկն ու ձկնամթերքը, իսկ հուլիսի 27-ից՝ կաթնամթերքը:
Սահմանափակումները ներառում են նաև Ռուսաստանի տարածքով դեպի ԵԱՏՄ այլ երկրներ հայկական ծագման արտադրանքի տարանցման արգելքը:
Օգոստոսի 10-ին ՀՀ ԿԲ դրամավարկային քաղաքականության վարչության պետ Վազգեն Պողոսյանը հայտարարել էր, որ ռուսական գործողությունների ազդեցությունը կարող է վերաբերել Հայաստանի ՀՆԱ-ի 1-1.5%-ին:
