«Հայաստանի էլեկտրական ցանցեր»-ը կհանձնվի հավատարմագրային կառավարման. Փաշինյան
ԵՐԵՎԱՆ, 6 օգոստոսի․/ԱՌԿԱ/. «Հայաստանի էլեկտրական ցանցեր» ընկերությունը կդառնա պետական սեփականություն և կհանձնվի հավատարմագրային կառավարման, հայտարարել է ՀՀ վարչապետ Նիկոլ Փաշինյանը:
«Այս առնչությամբ հարցը լուծված է։ Հայեցակարգային առումով մենք կողմնորոշվել ենք ՀԷՑ-ի հարցում»,- հինգշաբթի կառավարության նիստում ասել է Փաշինյանը:
Ընդ որում, վարչապետը չի հստակեցրել, թե ում կամ որ կառույցին է ընկերությունը հանձնվելու հավատարմագրային կառավարման:
ՀԷՑ-ի կարգավիճակի մասին
ՀՀ ԱԺ-ն 2025 թ.-ի հուլիսի 3-ին ընդունել է օրենսդրական փոփոխություններ, որոնք պետությանը թույլ են տալիս միջամտել «Հայաստանի էլեկտրական ցանցեր» ՓԲԸ-ի կառավարմանը:
2025 թ.-ի հուլիսի 18-ից ՀԷՑ-ի ժամանակավոր կառավարիչն է Ռոմանոս Պետրոսյանը:
ՀՀ վարչապետ Նիկոլ Փաշինյանը 2026 թ.-ի ապրիլի 9-ին հայտարարել է, որ «Հայաստանի էլեկտրական ցանցեր»-ը դե ֆակտո արդեն ազգայնացված է, իսկ հետագայում այդ կարգավիճակը կձևակերպվի իրավաբանորեն:
Իրավական տեղեկատվության պորտալում 2026 թ.-ի հունիսի 22-ին հրապարակվել է ՀԷՑ-ի 100% բաժնետոմսերի նկատմամբ հանրային գերակա շահ ճանաչելու մասին Հայաստանի կառավարության որոշման նախագիծը:
ՀԷՑ-ի և Սամվել Կարապետյանի քրեական գործի մասին
«Հայաստանի էլեկտրական ցանցեր» ՓԲԸ-ն կառավարում է հանրապետության միջին և ցածր լարման բաշխիչ ցանցերը և սպասարկում է շուրջ 1 մլն բաժանորդի:
2016 թ.-ից ՀԷՑ-ի սեփականատերն է «Տաշիր» ընկերությունների խումբը: Ընկերության տվյալներով՝ այդ ժամանակահատվածում ցանցերի արդիականացման մեջ ներդրվել է շուրջ 680 մլն դոլար, ևս մոտ 150–200 մլն դոլար՝ նոր հզորությունների ստեղծման համար:
«Տաշիր» ընկերությունների խմբի նախագահ Սամվել Կարապետյանը ձերբակալվել է 2025 թ.-ի հունիսի 18-ին և հետագայում կալանավորվել՝ նախ Հայ Առաքելական Եկեղեցուն աջակցող հայտարարությունից հետո իշխանությունը զավթելու հրապարակային կոչերի մեղադրանքով:
Քննության ընթացքում նրան մեղադրանք է առաջադրվել նաև հարկերից խուսափելու, գույքի հափշտակման, փողերի լվացման և ապօրինի ձեռնարկատիրական գործունեության համար:
Կարապետյանը չի ընդունում մեղքը: Նրա պաշտպանական խումբը քրեական հետապնդումն անվանում է քաղաքականապես մոտիվացված:
