Կիպրոսի առևտրաարդյունաբերական պալատը տեղական ընկերություններին հրավիրել է ՀՀ-ում կայանալիք ներդրումային ֆորումին

ԵՐԵՎԱՆ, 20 օգոստոսի․/ԱՌԿԱ/․ Կիպրոսի առևտրաարդյունաբերական պալատը (Keve) տեղական ներմուծողներին, դիստրիբյուտորներին և մանրածախ ցանցերին տեղեկացրել է Հայաստանում ITIF 2026 Միջազգային առևտրային և ներդրումային ֆորումին մասնակցելու հնարավորության մասին, հայտնում է Cyprus Mail-ը։

Ֆորումը կանցկացվի Երևանում 2026 թ.-ի հոկտեմբերի 7-9-ը։ Դրա կազմակերպիչն է Հայաստանի ներդրումային խորհուրդը՝ Վերակառուցման և զարգացման եվրոպական բանկի (ՎԶԵԲ) հովանու ներքո։

Միջոցառումը կմիավորի արտասահմանյան ներմուծողներին, դիստրիբյուտորներին, գնորդներին ու ներդրողներին հայկական ընկերությունների հետ։ Այս տարի ֆորումի հիմնական ոլորտային ուղղությունը կլինի սննդամթերքի և ըմպելիքների արտադրությունը։

Keve-ի տվյալներով՝ ֆորումի նպատակն է նպաստել միջազգային առևտրային և ներդրումային համագործակցության զարգացմանը՝ օտարերկրյա ընկերություններին հնարավորություն ընձեռելով ուղղակիորեն փոխգործակցել հայկական բիզնեսի հետ։

ITIF 2026-ի շրջանակում կգործի Hosted Buyers Programme ծրագիրը, որը թույլ է տալիս ընտրված արտասահմանյան գնորդներին, դիստրիբյուտորներին և մանրածախ ցանցերի ներկայացուցիչներին անվճար մասնակցել միջոցառմանը։ Ընտրությունը կիրականացվի կազմակերպիչների կողմից՝ հայտերի և հատուկ գնահատման հիման վրա։