ԵՄ–ն և ՄԱԿ–ը Հայաստանում գործարկել են օդի որակի մոնիթորինգի արդիականացման ծրագիր․ այն գնահատվում է շուրջ 2,47 մլն եվրո
ԵՐԵՎԱՆ, 20 օգոստոսի․/ԱՌԿԱ/․ Եվրոպական միությունը և ՄԱԿ-ի կառույցները Հայաստանի կառավարության հետ համատեղ օգոստոսի 19-ին պաշտոնապես գործարկել են «EU4Clean Air in Armenia» եռամյա ծրագիրը, որն ուղղված է օդի որակի մոնիթորինգի ազգային համակարգի արդիականացմանը և աղտոտվածության նկատմամբ վերահսկողության ուժեղացմանը:
Ինչպես հայտնում է UNDP Armenia-ն, ծրագիրը նախատեսված է մինչև 2029 թվականի փետրվարը: Եվրոպական միության ներդրումը կազմում է 2 մլն եվրո, նախագծի ընդհանուր բյուջեն՝ շուրջ 2,47 մլն եվրո:
Նախագիծն իրականացնում են ՄԱԿ-ի Զարգացման ծրագիրը, Առողջապահության համաշխարհային կազմակերպությունը, ՄԱԿ-ի Եվրոպական տնտեսական հանձնաժողովը և Ավստրիայի շրջակա միջավայրի գործակալությունը՝ հայաստանյան պետական կառույցների հետ համատեղ:
Առանցքային ուղղություններից մեկը կդառնա օդի որակի մոնիթորինգի ազգային ցանցի արդիականացումն ու ընդլայնումը:
Նախագծի շրջանակում նախատեսվում է ձեռք բերել և տեղադրել ԵՄ տեխնիկական պահանջներին համապատասխանող մոնիթորինգի առնվազն երկու նոր կայան, ինչպես նաև ստեղծել Մթնոլորտային օդի որակի վերահսկման Ազգային ռեֆերենս-լաբորատորիա և այն հագեցնել անհրաժեշտ սարքավորումներով:
Բացի այդ, ծրագիրը նախատեսում է տվյալների հավաքման և վերլուծության համակարգի զարգացում, մասնագետների ուսուցում և օդի որակի մասին տեղեկատվության նկատմամբ բնակչության հասանելիության բարելավում:
Դրա համար նախատեսվում է ներդնել նոր թվային գործիքներ, ներառյալ օդի որակի հատուկ պորտալ և բջջային հավելված:
Նախագիծը նախատեսում է նաև իրավական բազայի կատարելագործում և դրա հետագա մոտարկում եվրոպական չափանիշներին, այդ թվում՝ ԵՄ-ի հետ Համապարփակ և ընդլայնված գործընկերության համաձայնագրի շրջանակում Հայաստանի ստանձնած պարտավորություններին:
Նախագծի պաշտոնական նկարագրության համաձայն՝ Հայաստանում մոնիթորինգի գործող համակարգը միշտ չէ, որ թույլ է տալիս ստանալ մթնոլորտային օդի վիճակի, այդ թվում՝ արդյունաբերության, տրանսպորտի, շինարարության և հանքարդյունաբերության ազդեցության բավարար ամբողջական պատկերը:
Ծրագիրը պետք է ուժեղացնի պետական կառույցների կարողությունները՝ օդի որակի մոնիթորինգի, վերլուծության, կանխատեսման և կարգավորման ուղղությամբ:
