ԿԲ–ն հնարավոր է համարում անշարժ գույքի շուկայում ակտիվության հետագա դանդաղումը․ Մարտին Գալստյան
ԵՐԵՎԱՆ, 11 հունիսի․/ԱՌԿԱ/․ ՀՀ ԿԲ–ն հնարավոր է համարում անշարժ գույքի շուկայում ակտիվության հետագա դանդաղումը, ասաց ՀՀ ԿԲ նախագահ Մարտին Գալստյանը։
«Անշարժ գույքի շուկայում դիտարկվել են գների աճի տեմպերի դանդաղման միտումներ՝ եկամտահարկի վերադարձի աստիճանական դադարեցման և անշարժ գույքի պահանջարկի հնարավոր հագեցվածության պայմաններում։ Այս շուկայում ակտիվության հետագա դանդաղումը համարում ենք հնարավոր», – ասաց նա՝ ներկայացնելով ֆինանսական կայունության վերաբերյալ 2024թ․–ի հաշվետվությունը։
Գալստյանը նշեց, որ վերջին տարիներին շինթույլտվությունների և բնակարանային շինարարության բարձր աճը՝ զուգակցված անշարժ գույքի շուկայում պահանջարկի հնարավոր հագեցման և հետագա հնարավոր նվազման միտումների հետ, կարող է ստեղծել անշարժ գույքի շուկայի ավելցուկային առաջարկի ձևավորման ռիսկեր։
«Միևնույն ժամանակ, շինարարության ոլորտին տրամադրված վարկերի մեծածավալ աճը կարող է ոլորտում նախագծերի ֆինանսավորման աղբյուրների հնարավոր փոխարինման, պարտքային բեռի և դրանից ածանցված վարկային ռիսկի կուտակման ազդակ հանդիսանալ», – ասաց նա։
Ըստ Ազգային վիճակագրական կոմիտեի՝ 2025 թվականի ապրիլին Հայաստանի անշարժ գույքի շուկայում իրականացվել է 20,573 գործարք՝ 2024 թվականի ապրիլի 20,988 գործարքի և 2025 թվականի մարտի 19,345 գործարքի համեմատ: Ըստ գործարքի տեսակի՝ գերակշռել են օտարման գործարքները (7,168 գործարք կամ գործարքների ընդհանուր թվի 34.8%-ը), իսկ գույքի տեսակով՝ հողի հետ կապված գործարքները (8,121 գործարք կամ 39.5%):
