400 մլն դոլարով երկաթուղային կոնցեսիայի իրավունքը վաճառելու հնարավորություն կա․ Փաշինյան
ԵՐԵՎԱՆ, 24 օգոստոսի․/ԱՌԿԱ/․ Այսօր կա հնարավորություն մոտավորապես 400 մլն դոլարով այդ կոնցեսիայի իրավունքը վաճառելու, և դա լավ հնարավորություն է, հայտարարել է ՀՀ վարչապետ Նիկոլ Փաշինյանը՝ անդրադառնալով Հայաստանի երկաթուղու՝ «Ռուսական երկաթուղիներ» ընկերության կառավարման ներքո գտնվելուն։
«Այդ փաթեթի մեջ կարող են լինել նաև կոմպոնենտներ, որոնք ՌԴ-ի շահերի սպասարկման տեսակետից ավելի բարենպաստ միջավայր կձևավորեն»,- նշեց Փաշինյանն ԱԺ-ում կառավորության 2026-31 թվականների ծրագիրը ներկայացնելիս։
Վարչապետը կոչ արեց գնալ այդ ճանապարհով։
«Մենք շատ մեծ հարգանք ունենք ՌԴ շահերի նկատմամբ, բայց անտրամաբանական կլինի որևէ երկրի շահ ավելի բարձր դասել, քան մեր երկրի շահերը»,- հայտարարեց Փաշինյանը։
ՀԿԵ-ի հարցով Հայաստանի ծրագրերի մասին
2026 թվականի փետրվարին Փաշինյանը չբացառեց Ռուսաստանի կողմից հայկական երկաթուղու կառավարման իրավունքը մեկ այլ երկրի փոխանցելու հնարավորությունը, որը բարեկամական է ինչպես Հայաստանի, այնպես էլ Ռուսաստանի հետ, մասնավորապես՝ Քաթարին, ԱՄԷ-ին կամ Ղազախստանին:
Նա նաև հայտարարում էր, որ TRIPP նախագծի շրջանակում մի շարք երկրներ առաջարկում են Նախիջևանի և Ադրբեջանի հիմնական տարածքի միջև երկաթուղային հաղորդակցությունը կազմակերպել Հայաստանը շրջանցելով՝ նշելով, որ հայկական երկաթուղին գտնվում է ռուսական ընկերության կառավարման ներքո: Նրա խոսքով՝ դրա պատճառով «Հայաստանը կորցնում է մրցակցային առավելությունը»:
Հուլիսի 30-ին ՀՀ վարչապետ Նիկոլ Փաշինյանը «Հարավկովկասյան երկաթուղի» ընկերության կոնցեսիայի համատեքստում հնարավոր համարեց Ռուսաստանին 2 մլրդ դոլարի ֆինանսական պահանջներ ներկայացնելը: Նրա խոսքով՝ երկաթուղին Հայաստանի սեփականությունն է, և հանրապետությունն իրավասու է օգտագործել օրենքով նախատեսված ցանկացած մեխանիզմ, ներառյալ՝ արբիտրաժը: Միևնույն ժամանակ Փաշինյանը հայտարարեց, որ Երևանն ակնկալում է հարցը կարգավորել բարեկամական ձևաչափով՝ ռուսական կողմի հետ երկխոսության միջոցով:
Ավելի ուշ՝ նույն օրը, «Ռուսական երկաթուղիներ» ընկերության ղեկավար Օլեգ Բելոզերովը հայտարարեց, որ ռուսական կողմը մտադիր է հավատարիմ մնալ կոնցեսիոն համաձայնագրի պայմաններին և Հայաստանի կողմից դրա դադարեցման կամ փոփոխման դեպքում ակնկալում է ներդրված միջոցների վերադարձ:
