Հայաստանի սոցապահովման ոլորտում բյուջետային ծախսերը 2015թ.–ին մոտ 385.6 մլրդ դրամ կկազմեն. Ֆինանսների նախարարություն

ԵՐԵՎԱՆ, 31 հոկտեմբերի. /ԱՌԿԱ/. Հայաստանի սոցապահովման ոլորտում բյուջետային ծախսերը 2015 թվականին մոտ 385.6 մլրդ դրամ կկազմեն, ինչը շուրջ 23.5 մլրդ դրամով շատ է 2014 թվականի նույն ժամանակահատվածի համեմատ, ուրբաթ ասաց Հայաստանի ֆինանսների առաջին փոխնախարար Պավել Սաֆարյանը Ազգային ժողովի մշտական հանձնաժողովներում հաջորդ տարվա պետբյուջեի քննարկումների ընթացքում։

Ըստ նրա, սոցիալական ոլորտում ծախսերի աճը հիմնականում պայմանավորված է այն փաստով, որ 2015 թվականի հուլիսի 1–ից Հայաստանի նվազագույն աշխատավարձը կկազմի 55 հազար դրամ` 2014 թվականի 45 հազար դրամի դիմաց։

Այսպես, սոցիալական պաշտպանության ոլորտի ծախսերի կառուցվածքում մոտ 225.6 մլրդ դրամը բաժին է ընկնում աշխատանքային կենսաթոշակի վճարմանը, ինչը 29.9 մլրդ դրամով շատ է, քան 2014 թվականին։

Ինչպես նշեց Սաֆարյանը, աճը պայմանավորված է միջին կենսաթոշակի չափի բարձրացմամբ մինչև 41 հազար դրամ` 2014 թվականի 36 հազար դրամի դիմաց, ինչպես նաև` կենսաթոշակառուների թվի ավելացմամբ։

Նաև ավելի քան 13.2 մլրդ դրամ է նախատեսված կուտակային կենսաթոշակային համակարգի ներդրման գծով (2014 թվականին այդ գծով հատկացվել է ավելի քան 20.6 մլրդ դրամ)։

Հայաստանի 2015թ.-ի պետբյուջեի օրինագծի համաձայն՝ Հայաստանի 2015.-ի համախմբված պետբյուջեի եկամուտները կկազմեն 1 տրիլիոն 221 մլրդ դրամ, իսկ ծախսերը՝ 1 տրիլիոն 337 մլրդ դրամ: 2015 թ.-ի պետբյուջեի պակասուրդը նախատեսված է 116,6 մլրդ դրամի չափով ($1 –ը` 411,74  դրամ): -0-