Հայաստանի արտաքին առևտրաշրջանառությունը հունվար–հուլիսին աճել է 1,7%–ով՝ կազմելով 11,5 մլրդ դոլար
ԵՐԵՎԱՆ, 25 օգոստոսի․/ԱՌԿԱ/․ Հայաստանի արտաքին առևտրաշրջանառության ծավալը 2026 թվականի հունվար-հուլիսին կազմել է 11 538,2 մլն դոլար՝ 2025 թվականի նույն ժամանակահատվածի համեմատ ավելանալով 1,7%-ով, հայտնում է Վիճակագրական կոմիտեն:
Ընթացիկ տարվա հուլիսին, անցյալ տարվա հուլիսի համեմատ, ցուցանիշն աճել է 6,7%-ով, իսկ նույն տարվա հունիսի համեմատ՝ 9,2%-ով:
2026 թվականի հաշվետու ժամանակահատվածում դրամային համարժեքով արտաքին առևտրաշրջանառության ծավալը կազմել է 4 304,4 մլրդ դրամ:
Հայաստանից արտահանումը 2026 թվականի հունվար-հուլիսին, 2025 թվականի նույն ժամանակահատվածի համեմատ, կրճատվել է 7,9%-ով՝ կազմելով 4 035,7 մլն դոլար: Հուլիսին, անցյալ տարվա հուլիսի համեմատ, արձանագրվել է 15,7% անկում, իսկ այս տարվա հունիսի համեմատ արտահանումն աճել է 5,3%-ով: Դրամային համարժեքով 2026 թվականի 7 ամսում արտահանումը կազմել է 1 506,8 մլրդ դրամ:
Ներմուծումը հունվար-հուլիսին կազմել է 7 502,5 մլն դոլար՝ 2025 թվականի նույն ժամանակահատվածի համեմատ ավելանալով 7,7%-ով: Հուլիսին տարեկան կտրվածքով ներմուծումն աճել է 21,5%-ով, իսկ ամսական կտրվածքով՝ 11,1%-ով: Դրամային համարժեքով յոթ ամսվա ներմուծումը կազմել է 2 797,6 մլրդ դրամ:
