Հայաստանը դյուրացրել է փախստականներին փաստաթղթեր տրամադրելու գործընթացը
ԵՐԵՎԱՆ, 18 դեկտեմբերի. /ԱՌԿԱ/. ՀՀ խորհրդարանն ուրբաթ արտահերթ նիստի ժամանակ երկրորդ և վերջնական ընթերցմամբ ընդունել է «Փախստականների և օթևանի մասին» և «Պետական տուրքի մասին» օրենքներում նախատեսված փոփոխություններն ու լրացումները։
Ինչպես նշեց ՀՀ փոխոստիկանապետ Վարդան Եղիազարյանը, փոփոխություններով նախատեսվում է դյուրացնել փախստականներին փաստաթղթերի տրամադրման ու փաստաթղթերը ՄԱԿ–ի կոնվենցիաներին համապատասխանեցնելու գործընթացը։
Նրա խոսքով` այս պահին պետական ռեգիստրում որպես փախստական գրանցված է 2185 քաղաքացի, որոնցից 1506–ը` Ադրբեջանից։
Նա նշեց, որ քաղաքացիության տրամադրման և ՀՀ քաղաքացիներին անձնագրերի տրամադրման ընթացակարգի դյուրացման հաշվին փախստականների թիվը զգալիորեն կրճատվել է։
«Ցանկացած պահի նրանք բոլորը կարող են դիմել համապատասխան կառույցներ ՀՀ քաղաքացիություն ստանալու համար», – ասաց Եղիազարյանը։ –0–
