ՀՀ-ի կենսաթոշակային հիմնադրամները կուտակել են ավելի քան 4 մլրդ դոլար, սակայն շուկային չեն հերիքում կորպորատիվ արժեթղթերը. ԿԲ

ԵՐԵՎԱՆ, 29 մայիսի․/ԱՌԿԱ/. Հայաստանում կորպորատիվ արժեթղթերի շուկան դեռևս գտնվում է զարգացման վաղ փուլում և հետագա զարգացման կարիք ունի, մասնավորապես՝ կենսաթոշակային հիմնադրամների ակտիվների ներդրումներին աջակցելու համար, հայտարարել է ՀՀ Կենտրոնական բանկի նախագահ Մարտին Գալստյանը։

«Շրջանառության մեջ գտնվող կորպորատիվ արժեթղթերի անվանական արժեքը կազմում է ընդամենը 2,7 մլրդ դոլար՝ կենսաթոշակային հիմնադրամների ակտիվների ավելի քան 4 մլրդ դոլար զուտ արժեքի դիմաց»,- ասել է նա Հայաստանի ֆոնդային բորսայի 25-ամյակին նվիրված միջազգային համաժողովում։

Նշելով, որ կուտակային կենսաթոշակային համակարգի ներդրումից հետո կենսաթոշակային հիմնադրամներում խոշոր խնայողություններ են կուտակվել՝ Գալստյանն ասել է, որ կուտակումների աճի միտումը, ակնկալվում է, որ կշարունակվի։

«Ավելին, կենսաթոշակային կուտակումներն առ այսօր ավելի արագ են աճել, քան բանկային ակտիվները։ Ուստի մեզ անհրաժեշտ են նոր կորպորատիվ արժեթղթեր, որպեսզի այդ կուտակված խնայողություններն ուղղենք իրական տնտեսություն»,- ընդգծել է նա։

Պարտադիր կուտակային կենսաթոշակային համակարգը Հայաստանում ներդրվել է 2014 թ․-ի հունվարի 1-ից և գործում է 1974 թ․-ի հունվարի 1-ից հետո ծնված բոլոր քաղաքացիների համար։ Օրենքի համաձայն՝ եկամտի 10%-ը պետք է ուղղվի կենսաթոշակային համակարգին, ընդ որում՝ 2023 թ․-ի հունվարի 1-ից քաղաքացիներն ու պետությունը վճարումները կատարում են հավասար հիմունքներով (5-ական տոկոս)։

Հայաստանի օրենսդրության համաձայն՝ այսօրվա դրությամբ հիմնադրամներում ներդրումների առնվազն 60%-ն իրականացվում է հայկական դրամով, իսկ 40%-ը՝ արտարժույթով՝ միջազգային բորսաներում։

Կենսաթոշակային հիմնադրամների կառավարմամբ զբաղվում են երկու ընկերություններ՝ « C-QUADRAT Ampega Asset Management Armenia» ՍՊԸ-ն և «AMUNDI-ACBA ASSET MANAGEMENT» ՓԲԸ-ն։