Մերձավոր Արևելքի իրավիճակը կարող է հանգեցնել սահմանների փոփոխման և քրդական պետության ստեղծման. փորձագետ
ԵՐԵՎԱՆ, 23 մարտի. /ԱՌԿԱ/. Իրավիճակը Մերձավոր Արևելքում կարող է հանգեցնել սահմանների փոփոխման և քրդական պետության ստեղծան, կարծում է Հայաստանի ԳԱԱ Արևելագիտության ինստիտուտի տնօրեն, ակադեմիկոս Ռուբեն Սաֆրաստյանը, հաղորդում է «Նովոստի–Արմենիա» գործակալությունը։
«Մերձավոր Արևելքն այս դժվարին և արյունալի իրադարձությունների հետևանքով մոտենում է զարգացման այնպիսի մի փուլի, երբ առաջինը` կարող են վերանայվել սահմանները և երկրորդը` հնարավոր է ստեղծվի քրդական պետություն և ոչ թե Սիրիայում, այլ Իրաքի տարածքում», – ասել է Սաֆրաստյանը «Ժամանակ» օրաթերթին տրված հարցազրույցում:
Նրա խոսքով` այդ գործընթացները մոտակա տարիներին կզարգանան, և չի բացառվում, որ կազդեն նաև Թուրքիային վրա։
«Մենք չենք կարող դա բացառել, քանի որ Թուրքիայի սահմանները նույնպես ստեղծվել են Առաջին համաշխարհային պատերազնի արդյունքում։ Թուրքիայի տարածքում բնակվում են 10 միլիոնից ավելի քրդեր և եթե սկսվի քրդական պետության ձևավորումը, ապա պարզ է, որ Թուրքիայի քրդերն այդ գործընթացից անմասն չեն մնա», – նշել է նա։ –0–
