Փաշինյան. վաղն առավոտից բողոքի ավելի լայնածավալ ակցիա է սկսվելու
ԵՐԵՎԱՆ, 16 ապրիլի./ԱՌԿԱ/. «Քաղաքացիական պայմանագիր» կուսակցության առաջնորդ, «Ելք» ընդդիմադիր խմբակցության ղեկավար Նիկոլ Փաշինյանը քիչ առաջ Ֆրանսիայի հրապարակում կայացած հանրահավաքի ժամանակ ներկայացրեց ընդդիմադիր շարժման հետագա գործողությունները։
Ապրիլի 13–ի երեկոյան Փաշինյանը բողոքի շուրջօրյա ակցիա է սկսել Սերժ Սարգսյանի վարչապետության դեմ։ Ակցիայի մասնակիցները փակել են Ֆրանսիայի հրապարակի երթևեկը, որը կաթվածահար է արդեն երեք օր։ Երկուշաբթի առավոտից Երևանում կաթվածահար է երթևեկությունը գրեթե ողջ մեծ կենտրոնում։ Մետրոյի գնացքները կանգառներ չեն անում «Մարշալ Բաղրամյան» կայարանում։ Կառավարության շենքերի մոտ հերթապահում են ոստիկանության ջոկատներ։
Երկուշաբթի կեսօրին Բաղրամյան պողոտայում խոշոր բախումներ են տեղի ունեցել ցուցարարների և ոստիկանների միջև։ Ակտիվիստները փորձել են ճեղքել ոստիկանության պատնեշն ու շարժվել դեպի ՀՀ ԱԺ–ի շենք։ Ոստիկանությունը կիրառել է լուսաձայնային նռնակներ և փշալարեր։ Վնասվածքներ են ստացել մի քանի ցուցարարներ, այդ թվում` Նիկոլ Փաշինյանը, ինչպես նաև երեք ոստիկան։
«Վաղը մենք կկրկնենք «Փակիր փողոցը» ակցիան, և այն կլինի ավելի լայնամասշտաբ, մենք պետք է արգելափակենք Ազգային ժողով տանող բոլոր մուտքերը», – ասաց Փաշինյանը։
«Պետք է այդ փողոցները փակենք հնարավոր բոլոր միջոցներով` մեքենաներով, աղբամաններով, նստարաններով, բեռնատարերով, ԿԱՄԱԶ–ներով, ինչով հնարավոր է», – նշեց Փաշինյանը։
Նրա խոսքով, բողոքի ակցիաները պետք է լինեն ապակենտրոնացված, քանի որ փորձը ցույց է տալիս, որ այդ դեպքում ոստիկանները ևս ցրվում են և չեն կենտրոնանում մեկ ուղղությամբ։
«Կոչ եմ անում հանրապետության բոլոր քաղաքների և գյուղների բնակիչներին վաղը դուրս գալ փողոց, փակել հանրապետական նշանակության բոլոր մայրուղիները։ Կոչ եմ անում նաև բուհերին և դպրոցներին հայտարարել համահայաստանյան գործադուլ և դասադուլ», – նշեց Փաշինյանը։–0–
