Գիշերը ղարաբաղա–ադրբեջանական հակամարտ զորքերի շփման գծի հյուսիսային հատվածում ԴՇԿ տիպի գնդացրից արձակվել է մոտ 500 կրակոց
05.10.2016,
11:25
Հակառակորդի նախահարձակ ակտիվությունը ճնշելու համար ՊԲ առաջապահ զորամասերը դիմել են պատասխան գործողությունների։
ՍՏԵՓԱՆԱԿԵՐՏ, 5 հոկտեմբերի. /ԱՌԿԱ/. Հոկտեմբերի 4-ի լույս 5-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է ավելի քան 40 անգամ, որի ընթացքում տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է շուրջ 4000 կրակոց, հաղորդում է ԼՂՀ ՊՆ մամուլի ծառայությունը։
Առավել ինտենսիվ կրակոցներ են արձակվել շփման գծի հյուսիսային ուղղությամբ:
Նշված հատվածում միայն ԴՇԿ տիպի խոշոր տրամաչափի գնդացրից արձակվել է ավելի քան 500 կրակոց:
«Հակառակորդի նախահարձակ ակտիվությունը ճնշելու համար ՊԲ առաջապահ զորամասերը դիմել են պատասխան գործողությունների` շարունակելով լիակատար վերահսկողություն պահպանել առաջնագծում», – նշվում է հաղորդագրության մեջ։ –0–
