Պետդումայի պատգամավորները ծաղկեպսակներ կդնեն Գյումրիում զոհված ընտանիքի հիշատակին

ԵՐԵՎԱՆ, 22 հունվարի. /ԱՌԿԱ/. Այսօր ՌԴ պետդումայի մի խումբ պատգամավորներ կայցելեն Գյումրիի`  ծաղկեպսակներ  դրելու    յոթ հոգանոց զոհված  ընտանիքի հիշատակին  և հանդիպելու քաղաքի բնակչության հետ, ՌԻԱ Նովոստիին հայտարարել է  «Միասնական Ռուսաստան» խորհրդարանական խմբակցության անդամ, անվտանգության և հակակոռուպցիոն հարցերի հանձնաժողովի անդամ Բորիս Ռեզնիկը։

Հունվարի 12–ին Գյումրիում, որտեղ տեղակայված է ռուսական 102–րդ ռազմակայանը, վեց հոգանոց ընտանիք է սպանվել։ Միակ ողջ մնացածը վեց ամսական Սերյոժա Ավետիսյանը մահացել է հունվարի 19–ին։ Հանցագործության կատարման մեջ կասկածվում է ռուս ժամկետային զինծառայող Վալերի Պերմյակովը, նա ձերբակալվել է երեքշաբթի և ինքնախոստովանական ցուցմունք է տվել։ 

Ինչպես նշել է Ռեզնիկը պատգամավորների խմբում ընդգրկված են ԱՊՀ հարցերով հանձնաժողովի անդամ Իրինա Ռոդնինան, նույն հանձնաժողովի առաջին փոխնախագահ Օլեգ Լեբեդևը և Պետդումայի նախագահի խորհրդական Միխայիլ Կրուտովը։

«Մենք Գյումրի ենք գնում կարճ ժամանակով, ընդամենը 2 օր։ Այսօր մեկնում ենք։ Մեր առաքելությունն է ծաղկեպսակներ դնել սպանության հետևանքով զոհված ընտանիքի գերեզմանին»,– ասել է Ռեզնիկը, հաղորդում է ՌԻԱ Նովոստին։ 

«Նախատեսում ենք հանդիպումներ Հայաստանի խորհրդարանում, այնուհետև Գյումրիի ղեկավարների հետ, ինչպես նաև Գյումրու բնակիչների հետ։ Մենք պետք է զրուցենք նրանց հետ, բացատրենք մեր դիրքորոշումը»,–ավելացրել է պատգամավորը։–0–