ԵԱՀԿ Մինսկի խմբի ղարաբաղյան կարգավորման համանախագահները հանդես են եկել հայտարարությամբ
ԵՐԵՎԱՆ, 13 հոկտեմբերի․ /ԱՌԿԱ/․ ԵԱՀԿ Մինսկի խմբի ղարաբաղյան կարգավորման համանախագահներ Իգոր Պոպովը (ՌԴ), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) երեքշաբթի հանդես են եկել հայտարարությամբ :
Միջնորդները մտահոգությամբ են նշել Լեռնային Ղարաբաղի հակամարտությունում շարունակվող բռնությունները:
«Համանախագահները կոչ են անում Ադրբեջանի նախագահ Իլհամ Ալիևին և ՀՀ վարչապետ Նիկոլ Փաշինյանին անհապաղ քայլեր ձեռնարկել կողմերի պարտավորությունները լիարժեքորեն կատարելու համար` հոկտեմբերի 10-ի մոսկովյան հայտարարության համաձայն`տարածաշրջանի համար աղետալի հետևանքները կանխելու համար», - ասված է փաստաթղթում:
Համանախագահները կրկին հայտարարում են, որ քաղաքացիական անձանց զոհերն անընդունելի են ցանկացած պարագայում: Նրանք նաև կոչ են անում կողմերին անհապաղ իրականացնել հումանիտար հրադադար՝ զոհվածների մարմինների, ռազմագերիների և պահվող այլ անձանց վերադարձն ապահովելու համար, ինչպես նաև կողմերին կոչ են անում շտապ համաձայնության գալ կրակի դադարեցման ռեժիմը դիտարկելու մեխանիզմի շուրջ:
«Հայաստանի և Ադրբեջանի արտգործնախարարների՝ Զոհրաբ Մնացականյանի և Ջեյհուն Բայրամովի հետ բանակցություններից հետո, համանախագահները կողմերի հետ աշխատում են Լեռնային Ղարաբաղի հակամարտության քաղաքական կարգավորման հիմնահարցերի շուրջ, բանակցային լուծման հասնելու համար», - ասվում է հայտարարության մեջ:-0-
