Ղարաբաղյան հակամարտության հարցում Ուկրաինան կշարունակի օժանդակել ԵԱՀԿ ՄԽ–ին. ԵԱՀԿ նախագահ

ԵՐԵՎԱՆ, 17 հունվարի. /ԱՌԿԱ/. Ուկրաինան կշարունակի օժանդակություն ցուցաբերել ԵԱՀԿ Մինսկի խմբին ղարաբաղյան հակամարտության հարցում, հայտարարել է ԵԱՀԿ գործող նախագահ, Ուկրաինայի ԱԳՆ ղեկավար Լեոնիդ Կոժարան Վիեննայում կայացած մամուլի ասուլիսում, որն օնլայն–ռեժիմով հեռարձակվում էր ԵԱՀԿ պաշտոնական կայքում։

Կոժարան նշել է, որ ԵԱՀԿ–ն կշարունակի գործունեությունը հակամարտության խաղաղ կարգավորման և կողմերի միջև բանակցային գործընթացի ակտիվացման ուղղությամբ։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-