ՀՀ նախագահը և Իրանի էներգետիկայի նախարարը համատեղ նախագծեր են քննարկել
ԵՐԵՎԱՆ, 24 դեկտեմբերի. /ԱՌԿԱ/. Հայաստանի նախագահ Սերժ Սարգսյանը և Իրանի էներգետիկայի նախարար, հայ–իրանական միջկառավարական հանձնաժողովի համանախագահ Համիդ Չիթչիանը քննարկել են ենթակառուցվածքային և ներդրումային երկկողմ նախագծերը, հայտնում է պետության ղեկավարի մամուլի ծառայությունը։
Հանդիպման ընթացքում քննարկվել են նաև նաև տարածաշրջանային համագործակցությանն առնչվող հարցեր: Այդ համատեքստում կողմերը գոհունակությամբ են փաստել, որ իրականություն է դառնում Հյուսիս-հարավ էլեկտրաէներգետիկ ծրագիրը, ինչը ենթադրում է համապատասխան համակարգերի զուգահեռ աշխատանք Իրանի, Հայաստանի, Վրաստանի և Ռուսաստանի միջև:
Նախօրեին Երևանում ստորագրվել է քառակողմ հուշագիր Հայաստանի, Վրաստանի, Իրանի և Ռուսաստանի միջև, որը նախատեսում է փոխադարձ էներգահոսքերի, էներգահամակարգերի անվտանգության և հուսալիության մակարդակի բարձրացում։ Հուշագրի շրջանակում ծրագրված են Հյուսիս–Հարավ էլեկտրաէներգետիկ միջանցքի ստեղծմանն ուղղված մի շարք միջոցառումներ, ինչը հնարավորություն կտա աշխատելու ԵՏՄ և ԵՄ էներգահամակարգերի հետ։
Սարգսյանը հույս հայտնեց, որ երկկողմ գործակցության օրակարգը Երևանում կայացած հայ–իրանական միջկառավարական հանձնաժողովի նիստի արդյունքներով կընդլայնվի։
Կողմերը կարևորեցին առևտրատնտեսական հարաբերությունների նշանակությունը և այդ ոլորտի ներուժի լիարժեք օգտագործման անհրաժեշտությունը։ -0-
