Նալբանդյանը վերահաստատել է Հայաստանի` Եվրամիության հետ փոխգործակցությունը բոլոր հնարավոր ուղղություններով շարունակելու ցանկությունը

ԵՐԵՎԱՆ, 13 սեպտեմբերի. /ԱՌԿԱ/. ՀՀ ԱԳՆ ղեկավար էդվարդ Նալբանդյանը նախօրեին ԵՄ Ընդլայնման և Եվրոպական հարևանության քաղաքականության հարցերով հանձնակատար Շտեֆան Ֆյուլեի հետ կայացած հանդիպման ընթացքում վերահաստատել է Հայաստանի` Եվրամիության հետ փոխգործակցությունը բոլոր հնարավոր ուղղություններով շարունակելու ցանկությունը, տեղեկացնում է ՀՀ ԱԳՆ մամուլի ծառայությունը։

Զրուցակիցները շարունակել են սեպտեմբերի 5-ին Բրյուսելում կայացած քննարկումները, կարևորել են Վիլնյուսի գագաթաժողովին ընդառաջ Երևանում Արևելյան գործընկերության երկրների արտգործնախարարների և կրթության նախարարների ոչ պաշտոնական հանդիպման անցկացումը:

Սեպտեմբերի 3-ին Հայաստանի և Ռուսաստանի նախագահներ Սերժ Սարգսյանի և Վլադիմիր Պուտինի բանակցություններից հետո հայտարարվել է, որ Հայաստանը միանալու է Մաքսային միությանը և հետագայում ներգրավվելու է Եվրասիական տնտեսական միության ձևավորման գործընթացում։ Ավելի վաղ նախատեսվում էր, որ Հայաստանը կնախաստորագրի ԵՄ–ի հետ ասոցացման համաձայնագիրը։ ՄՄ–ին միանալու որոշումը Երևանում արևմտամետ ուժերի վրդովմունքի պատճառ դարձավ։ -0-