Կովկասի բնության հիմնադրամը 12,4 հազար դոլար է տրամադրել Սևանա լճում ձկնային պաշարների հետազոտման նպատակով
ԵՐԵՎԱՆ, 22 ապրիլի./ԱՌԿԱ/. Կովկասի բնության հիմնադրամը (CNF) 12,4 հազար դոլար է տրամադրել Հայաստանին Սևանա լճում և այլ ջրավազաններում ձկնային պաշարների հետազոտման նպատակով։
Ծրագիրն իրականացվում է հիմնադրամի կողմից` Շրջակա միջավայրի նախարարության համագործակցությամբ։
Միջոցները տրամադրվելու են ԳԱԱ Կենդանաբանության և հիդրոէկոլոգիայի գիտական կենտրոնին՝ Սևանա լճում և այլ ջրավազաններում ձկնային պաշարների հետազոտման նպատակով ժամանակակից ձայնախորաչափի գործարկման համար անհրաժեշտ ծրագրային փաթեթի ձեռք բերման համար։
Ինչպես նշվում է հիմնադրամի մամուլի հաղորդագրության մեջ, աջակցության վերաբերյալ համապատասխան պայմանագիրը կնքվել է CNF-ի գործադիր տնօրեն Ջորջ Ջակոմինիի և ԳԱԱ Կենդանաբանության և հիդրոէկոլոգիայի գիտական կենտրոնի տնօրեն Բարդուխ Գաբրիելյանի միջև:
Տրված գումարով ձեռք կբերվի ձկնային պաշարների հետազոտման նպատակով կենտրոնի կողմից գնված ձայնախորաչափի գործունեությունն ապահովող ծրագրային փաթեթը:
Նշվում է, որ Կովկասի բնության հիմնադրամը շարունակելու է Շրջակա միջավայրի նախարարության համագործակցությամբ ցուցաբերել անհրաժեշտ աջակցությունը Հայաստանի եզակի կենսաբազմազանության արդյունավետ պահպանության գործում:–0–
