Ավինյան․ ավելի խիստ կանոններ ենք սահմանել նոր համալիր շինարարությունների հետ կապված.
ԵՐԵՎԱՆ, 9 սեպտեմբերի․/ԱՌԿԱ/․ Երևանի քաղաքապետարանն ավելի խիստ կանոններ է սահմանել նոր համալիրների շինարարությունների համար, հայտարարել է Երևանի քաղաքապետ Տիգրան Ավինյանը։
Անդրադառնալով հարցին, թե արդյոք Երևանում կառուցապատողն ինքն է որոշում, թե տվյալ հատվածում քանի հարկանի շենք կարող է կառուցել, Ավինյանը նշեց, որ նման հնարավորություն կառուցապատողը չունի։
«Կարող է ունենալ նման ցանկություն, բայց մենք ունենք ընդունված գլխավոր հատակագիծ»,- ասաց Ավինյանը լրագրողների հետ ճեպազրույցում։
Քաղաքապետն ընդգծեց, որ կա ճարտարապետական խորհուրդ՝ բաղկացած հինգ ճարտարապետներից, որոնցից ամեն մեկը վեց ամիսը մեկ փոխարինվում է նոր ճարտարապետով, որպեսզի ընդհանուր ճարտարապետական համայնքի կարծիքը հնարավոր լինի ամփոփել այդ խորհրդում։
«Փաստացի մեր խորհուրդն է տալիս վերջնական եզրակացություն, թե որ հատվածում ինչ տեսակի շինարարություն է հնարավոր։ Մենք ավելի խիստ կանոններ ենք սահմանել նոր համալիր շինարարությունների հետ կապված», - նշեց Ավինյանը։
Նա հայտնեց, որ կառուցապտման ենթակա հողերի մակերեսները նվազեցվել են, ինչպես նաև առկա են այդ տեսակ բազմաթիվ նոր սահմանափակումներ։
