Գազի ներքին սակագները Հայաստանում քրոնիկ խնդիր են, որը մի քանի տարի է չի լուծվում. Լավրով

ԵՐԵՎԱՆ, 21 ապրիլի․ /ԱՌԿԱ/․ Հայ սպառողի համար ռուսական գազի գինը սահմանվում է հենց Հայաստանի ներսում գործող սակագներով, երեքշաբթի ասաց Ռուսաստանի արտգործնախարար Սերգեյ Լավրովը:

«Ներքին սակագները Հայաստանում քրոնիկ խնդիր են, որը մի քանի տարի է չի լուծվում: Այս սակագներն այնքան բարձր են, որ դժվարացնում են գների առավել գերադասելի մոտեցումները կիրառելը», - ասաց նա «Գորչակովի հիմնադրամի» կողմից կազմակերպված առցանց քննարկման ժամանակ:

Նախարարը անտեղի է համարել հիշել Ռուսաստանի հետ դաշնակցային հարաբերությունների մասին միայն որոշակի իրավիճակներում կամ հարաբերությունների ոլորտներում:

«Մեր բելառուս և հայ ընկերների դիմումները դիտարկելիս հաշվի են առնվում մեր դաշնակցային հարաբերությունները, բայց սխալ է հիշել դրանց մասին միայն այն դեպքում, երբ իրավիճակը տրամագծորեն հակառակ է դառնում նրան, ինչ 3-4 տարի առաջ էր. այն ժամանակահատվածին, երբ գնագոյացման մեխանիզմը ձևավորվել է՝ ամբողջությամբ հաշվի առնելով դաշնակցային պարտավորությունները», - ասել է Լավրովը։

Նրա խոսքով, երբ Հայաստանի և Բելառուսի համար ռուսական գազի գինը 2-3 անգամ ավելի ցածր էր, քան հիմա, դա ընկալվում էր որպես շնորհ, և ոչ ոք չէր ասում, որ դա քաղաքականություն է:

«Բոլորն ասում էին, որ այդպես է պետք: Իհարկե, դաշնակիցները պետք է ստանան տնտեսական առավելություններ, բայց կան նաև պայմանագրային պարտավորություններ », - ասաց նա:

Լավրովն ընդգծել է, որ դաշնակցային հարաբերությունները պետք է դրսևորվեն փոխհարաբերության բոլոր ոլորտներում,այդ թվում՝ տնտեսական:

«Խոսելով տնտեսության մասին, մենք հուսով ենք, որ անցած մի քանի տարիներին համատեղ ձեռնարկությունների՝ ներառյալ« Հարավկովկասյան երկաթուղիների» վերաբերյալ Հայաստանում սկսված դատական ​​գործերը, կկարգավորվեն առանց փորձելու բերել դրա մեջ այնպիսի բաներ, որոնք հարիր չեն դաշնակիցների միջև հարաբերություններին: Հուսով եմ, որ այս բոլոր հարցերը, մենք կհարթենք երկուստեք գոհունակությամբ », - ասել է նա։-0-