Հայաստանում բյուջեն շտկվում է. պաշտպանության ոլորտի ծախսերը կաճեն 40 մլրդ դրամով

ԵՐԵՎԱՆ, 3 հոկտեմբերի․ /Նովոստի-Արմենիա/․ Հոկտեմբերի 6-ին Հայաստանի Ազգային ժողովը կգումարի արտահերթ նիստ, որի ընթացքում կընդունվեն 2020 թվականի պետական ​​բյուջեի փոփոխություններ, ինչպես նաև կվերացվեն լրացուցիչ արտաբյուջետային եկամուտների օգտագործման սահմանափակումները:

Նշվում է, որ «Ռազմական դրության իրավական ռեժիմի մասին» օրենքի համաձայն, Կառավարությունը ռազմական դրություն հայտարարվելուց հետո՝ ոչ ուշ, քան 10-օրյա ժամկետում, ՀՀ Ազգային ժողով է ներկայացնում ընթացիկ տարվա` Հայաստանի Հանրապետության պետական բյուջեում փոփոխություններ և լրացումներ կատարելու մասին օրենքի նախագիծ, որին կցվում է ՀՀ կառավարության ծրագրում փոփոխություններ կատարելու տեղեկանքը:

Նախագծում նշվում է, որ ռազմական գործողությունների և ռազմական դրության ակտիվացումը բացասական ազդեցություն կունենա նաև տնտեսական գործունեության վրա:

«Մասնավորապես, սպասվում է զբաղվածության ժամանակավոր նվազում, մասնավոր հատվածում պահանջարկի կրճատում, ինչպես նաեւ անորոշությունների եւ ռիսկերի աճ: Արդյունքում, 2020թ. սպասվում է 6.8% տնտեսական անկում ապրիլին բյուջեի օրենքի փոփոխությունների հիմքում ընկած 2% անկման դիմաց: Իսկ անվանական ՀՆԱ-ն կնվազի՝ կազմելով 6170,2 մլրդ դրամ ապրիլին բյուջեի օրենքի փոփոխությունների հիմքում ընկած 6485 մլրդ դրամի դիմաց», - ասվում է նախագծում:

Ընդգծվում է, որ նտեսական անկման պայմաններում հարկային եկամուտները կնվազեն ավելի արագ տեմպերով, քան ՀՆԱ-ի նվազումը, հետեւաբար տեղի կունենա հարկեր/ՀՆԱ-ի անկում՝ շուրջ 0.3 տոկոսային կետի չափով:

«Անվանական ՀՆԱ-ի, ինչպես նաեւ հարկեր/ՀՆԱ-ի նվազման պայմաններում, սպասվում է հարկային եկամուտների նվազում մոտ 35 մլրդ դրամով: Ռազմական գործողություններով պայմանավորված սպասվում է ընթացիկ ծախսերի աճ՝ մոտ 40 մլրդ դրամի չափով», - նշված է նախագծում:

ՀՀ կենտրոնական բանկը նախկինում վերանայել էր ՀՆԱ-ի կանխատեսումը դեպի ներքև: Կարգավորողի նոր գնահատականների համաձայն, Հայաստանում տնտեսական անկումը 2020 թվականի վերջին կկազմի 6,2%, նախկինում կանխատեսված անկման փոխարեն` 4% -ի սահմաններում:

2020 թվականի ապրիլի 29-ին Հայաստանի Ազգային ժողովը հաստատեց բյուջեի ցուցանիշների վերանայումը `COVID-19- ին դիմակայելու համար: Հաշվի առնելով կորոնավիրուսի հետ կապված իրավիճակի անբարենպաստ ազդեցությունը, ՀՆԱ-ի բյուջեի կանխատեսումը իջեցվեց մինչև 2% անկում (նախկինում բյուջեն նախատեսում էր աճ 4.9% -ով ընթացիկ տարվա համար), իսկ դեֆիցիտը հասցվեց 340 մլրդ դրամի կամ ՀՆԱ-ի 5% -ի ( նախկինում 2.3%):-0-