Հայաստանն ու Հունաստանը կխորացնեն համագործակցությունը էներգետիկայի և ջրային ռեսուրսների ոլորտում

ԵՐԵՎԱՆ, 23 հուլիսի․/ԱՌԿԱ/․ Հայաստանի և Հունաստանի կարգավորող մարմինները փոխըմբռնման հուշագիր են ստորագրել, որը նախատեսում է համագործակցության զարգացում էներգետիկայի և ջրային ռեսուրսների ոլորտում, հայտնում է Հայաստանի Հանրային ծառայությունները կարգավորող հանձնաժողովի (ՀԾԿՀ) մամուլի ծառայությունը։

Փոխըմբռնման մասին փաստաթղթի տակ իրենց ստորագրություններն են դրել ՀԾԿՀ նախագահ Մեսրոպ Մեսրոպյանը և Էներգետիկայի, աղբի և ջրային ռեսուրսների ոլորտում Հունաստանի կարգավորող մարմնի (RAAYE) ղեկավար Կոնստանտինոս Ցիմարասը։

Միջոցառման ժամանակ Մեսրոպյանը հուշագրի ստորագրումն անվանել է կարևոր քայլ երկու երկրների մասնագիտացված կառույցների միջև գործընկերության ամրապնդման գործում։

Նրա խոսքով՝ նոր հնարավորություններ կստեղծի փորձի և լավագույն կարգավորող պրակտիկայի փոխանակման, մասնագիտական կարողությունների ամրապնդման և ոլորտներում արդյունավետ կարգավորման ապահովման համար։

Ցիմարասն իր հերթին ընդգծել է հայկական կարգավորող մարմնի հետ համագործակցության կարևորությունը և վստահություն հայտնել, որ ստորագրված հուշագիրը նոր հնարավորություններ կստեղծի՝ ի շահ երկու երկրների կարգավորող համակարգերի զարգացման։