Պռոշյանի կոնյակի գործարանն այս սեզոնին նախատեսում է մթերել ավելի քան 32 հազար տոննա խաղող
ԵՐԵՎԱՆ, 30 սեպտեմբերի․/ԱՌԿԱ/․ «Պռոշյանի կոնյակի գործարան» ՍՊԸ–ն այս սեզոնին նախատեսում է մթերել ավելի քան 32 հազար տոննա խաղող, հաղորդում է Էկոնոմիկայի նախարարությունը։
ՀՀ էկոնոմիկայի նախարար Գևորգ Պապոյանը սեպտեմբերի 29-ին այցելել է «Պռոշյանի կոնյակի գործարան» ՍՊԸ-ի Արտաշատի մթերման կետ՝ խաղողի մթերումների ընթացքին հետևելու և առկա խնդիրները տեղում քննարկելու նպատակով։ Նախարարին ուղեկցել է նախարարի տեղակալ Արման Խոջոյանը։
Ընկերությունում խաղողի մթերումները գտնվում են ակտիվ փուլում։ Ընկերության բոլոր մասնաճյուղերում այս պահի դրությամբ արդեն մթերվել է շուրջ 13 հազար տոննա խաղող։
Խաղողի մթերումն իրականացվում է միջինը 140 դրամ/կգ գնով։ Օրական մթերվող խաղողի ծավալը միջինում կազմում է շուրջ 1 500 տոննա։
Նախարարությունից նշել են, որ խաղողի մթերումն իրականացվում է բնականոն և կազմակերպված կերպով։
