Ռոսսելխոզնադզորը նշել է ՀՀ-ից ձկնամթերքի և կաթնամթերքի ներկրման սահմանափակումների պահպանման պատճառները
ԵՐԵՎԱՆ, 26 սեպտեմբերի․ /ԱՌԿԱ/․ Ռուսաստանը պահպանում է Հայաստանից ձկնամթերքի և կաթնամթերքի ներկրման արգելքը՝ դրանց արտադրության ընթացքում խախտումների վերացումը հաստատող փաստաթղթերի բացակայության պատճառով, հայտնում է ՏԱՍՍ-ը՝ հղում անելով Ռոսսելխոզնադզորին։
«Ռոսսելխոզնադզորին չեն տրամադրվել հայկական կողմից ձկնամթերքի և կաթնամթերքի արտադրության ընթացքում խախտումների վերացումը հաստատող փաստաթղթեր։ Հայաստանի տեսչական մարմնից ստացվել են միայն երաշխիքներ և միջնորդագրեր։ Սա բավարար չէ սահմանափակումները հանելու համար։ Այս մասին տեղեկատվությունն ուղարկվել է հայկական կողմին», - մեջբերում է գործակալությունը գերատեսչության հաղորդագրությունը։
Հրապարակման պահին Հայաստանի սննդամթերքի անվտանգության տեսչական մարմնի մեկնաբանությունը Ռոսսելխոզնադզորի այս հայտարարության վերաբերյալ բացակայում էր։
«ԱՌԿԱ»-ն հարցում կուղարկի պաշտոնական մեկնաբանություն ստանալու համար։
Դեպի ՌԴ հայկական արտադրանքի մատակարարումների սահմանափակումների մասին
Ռուսաստանը մայիսի վերջից փուլ առ փուլ սահմանափակումներ է մտցնում Հայաստանից մի շարք ապրանքատեսակների մատակարարումների վրա՝ դա պատճառաբանելով բուսասանիտարական պահանջների խախտումներով: Սահմանափակումների ներքո են հայտնվել ծաղկային արտադրանքը, հանքային ջուրը, որոշ ըմպելիքներ և ալկոհոլային արտադրանքի որոշ տեսակներ, բանջարեղենը, մրգերը, հատապտուղները, խաղողը, կարտոֆիլը, չորամրգերը, ավելի ուշ՝ թարմ ձուկն ու ձկնամթերքը, իսկ հուլիսի 27-ից՝ կաթնամթերքը:
Սահմանափակումները ներառում են նաև Ռուսաստանի տարածքով դեպի ԵԱՏՄ այլ երկրներ հայկական ծագման արտադրանքի տարանցման արգելքը:
Օգոստոսի 10-ին ՀՀ ԿԲ դրամավարկային քաղաքականության վարչության պետ Վազգեն Պողոսյանը հայտարարել էր, որ ռուսական գործողությունների ազդեցությունը կարող է վերաբերել Հայաստանի ՀՆԱ-ի 1-1.5%-ին:
