«Ռուսաստան, Իրան, Ադրբեջան և Թուրքիա». ԱԽ քարտուղարը ` դեպի Հայաստան գազի մատակարարումների դիվերսիֆիկացման մասին
ԵՐԵՎԱՆ, 16 սեպտեմբերի․ /ԱՌԿԱ/․ Հայաստանը մտադիր է դիվերսիֆիկացնել գազի մատակարարման աղբյուրները՝ այն միաժամանակ գնելով Ռուսաստանից, Իրանից, Ադրբեջանից և Թուրքիայից, հայտարարել է ՀՀ Անվտանգության խորհրդի քարտուղար Ալեն Սիմոնյանը։
«Բոլոր հնարավոր տնտեսական և անվտանգային հարցերում Հայաստանն ընտրել է, ընտրելու է այլընտրանքներ ու բալանսներ։ Այս մարտավարությունը շարունակվելու է», - նշեց Սիմոնյանը ճեպազրույցում՝ պատասխանելով Հայաստանի համար գազի հնարավոր թանկացման և ռուսական գազի հնարավոր այլընտրանքների վերաբերյալ Մոսկվայի հայտարարությունների մասին հարցին։
Նրա խոսքով՝ Հայաստան գազի այլընտրանքային մատակարարումները կարող են իրականացվել բոլոր հնարավոր երկրներից։
«Ո՞վ ասաց, որ մենք ինչ-որ մի երկրի կախվածությունը պատրաստվում ենք փոխարինել մեկ այլ երկրից կախվածությամբ», - ասաց Սիմոնյանը։
Նրա խոսքով` Հայաստանը պատրաստվում է գազ գնել բոլոր հնարավոր տեղերից՝ միաժամանակ Ռուսաստանից, Ադրբեջանից, Իրանից և Թուրքիայից։
«Իսկ ո՞վ է ասաց, որ ռուսական գազն ավելի էժան է։ Իսկ ով ասաց, որ գազի գինը միայն դոլարով է չափվում։ Տեսնում եք, որ դա օգտագործվում է որպես քաղաքական արժույթ», - ասաց ԱԽ քարտուղարը։
Գազի մատակարարումների մասին
2026 թ.-ի մայիսի վերջին ռուսական իշխանությունները նախազգուշացրել են Հայաստանին էներգառեսուրսների մատակարարման պայմանների հնարավոր փոփոխության մասին՝ Երևանի եվրաինտեգրման կուրսի ֆոնին: ՌԴ նախագահի մամուլի քարտուղար Դմիտրի Պեսկովը հայտարարել է, որ Հայաստանի համար ռուսական գազի արտոնյալ գինը կարող է դառնալ շուկայական՝ հանրապետության ԵԱՏՄ-ից դուրս գալու դեպքում:
ՌԴ նախագահ Վլադիմիր Պուտինը հայտարարում էր, որ նման դեպքում Ռուսաստանին ստիպված կլինի կրճատել ինտեգրացիոն տնտեսական համագործակցությունը Հայաստանի հետ: Նրա գնահատմամբ՝ հանրապետությունը կարող է կորցնել ՀՆԱ-ի մինչև 14%-ը՝ ԵԱՏՄ-ից դուրս գալուց հետո էներգակիրների գների աճի դեպքում:
Բացի այդ, ՌԴ էներգետիկայի նախարար Սերգեյ Ցիվիլյովը նամակ է հղել հայկական կողմին, որում Մոսկվան նախազգուշացրել է 2013 թվականի դեկտեմբերի 2-ի՝ գազի, նավթամթերքի և չմշակված ալմաստների մատակարարման մասին համաձայնագիրը կասեցնելու կամ չեղարկելու հնարավորության մասին՝ Հայաստանի ԵՄ անդամակցության գործընթացը շարունակելու դեպքում: Ավելի ուշ Ցիվիլյովը պարզաբանել է, որ Հայաստանի՝ ԵԱՏՄ-ից ԵՄ անցման դեպքում Ռուսաստանը չի կարողանա նրան գազ մատակարարել ներկայիս գնով:
Ընթացիկ տարվա օգոստոսի վերջին ՀՀ ֆինանսների նախարար Վահե Հովհաննիսյանը հայտարարել էր, որ կառավարությունն իրականացրել է ռուսական գազի գնի բարձրացման հնարավոր հետևանքների հաշվարկներ և մտադիր է այդ հաշվարկները ներդնել ռիսկերի գնահատման իր համակարգում:
Մենաշնորհային մատակարար
«Գազպրոմ Արմենիա» ՓԲԸ-ն ռուսական «Գազպրոմ» հոլդինգի 100%-անոց դուստր ձեռնարկությունն է, Ռուսաստանից Հայաստան ներքին սպառման համար բնական գազի մենաշնորհային մատակարարը:
Այսօրվա դրությամբ ռուսական գազի գինը Հայաստանի համար սահմանին կազմում է 165 դոլար՝ հազար խորանարդ մետրի դիմաց: Այս գինը գործում է 2019 թ.-ի հունվարի 1-ից և, գործող հայ-ռուսական համաձայնագրերի համաձայն, չպետք է փոխվի մինչև 2031 թ.-ի վերջը:
