Հայաստանը ԿԶԵՀ–ից 3մլն դոլարի դրամաշնորհ է ստացել ինֆեկցիոն հիվանդությունների դեմ պայքարի հնարավորությունների ընդլայնման նպատակով
ԵՐԵՎԱՆ, 22 մայիսի․/ԱՌԿԱ/․ Հայաստանում աշխատանքներ են տարվում ինֆեկցիոն հիվանդությունների վերահսկման և պայքարի հնարավորությունների ընդլայնման ուղղությամբ Կայունացման և զարգացման եվրասիական հիմնադրամից (ԿԶԵՀ) ստացված 3 մլն դոլար դրամաշնորհի շրջանակում։
ԿԶԵՀ–ում դրամաշնորհային ուղղության ղեկավար Թամարա Մալսագովան Արտաշատում լրագրողներին ասաց, որ հատկացված միջոցներով նախատեսվում է վերակառուցել «Հիվանդությունների վերահսկման և կանխարգելման ազգային կենտրոն» ՊՈԱԿ-ի Արտաշատի և Էջմիածնի մասնաճյուղերը, ինչպես նաև կառուցել նոր մասնաճյուղ Վանաձորում։
«Արտաշատում գտնվող օբյեկտի շինարարությունն ավարտվում է։ Իրականում, այդ օբյեկտներն ընտրվել են գիտակցաբար, գնահատվել են թե՛ տեխնիկական վիճակը, թե՛ հագեցվածությունը։ Եվ Հայաստանի Հանրապետություն մեր նախագծի շրջանակում առաջարկեց «Արմավիր» օբյեկտն ու մասնաճյուղը, քանի որ դրանք ամենավատ վիճակում էին», – ասաց նա։
Մասնավորապես, Մալսագովան նշեց, որ իրականացված աշխատանքների շրջանակում, թեև պատերի վերակառուցում չի պահանջվել, սակայն վերանորոգվել են պատերն ու տանիքը, կատարվել են ներքին հարդարման աշխատանքներ։ Բացի այդ, ներդրվել է օդափոխության նոր համակարգ։
«Նման մակարդակի լաբորատորիաները պետք է հագեցած լինեն անհատական փակ օդափոխման համակարգով, որպեսզի օդը չհայտնվի օդափոխության ընդհանուր համակարգում»,- ասաց նա։
Մալսագովան ասաց, որ կտեղադրվեն նոր սարքավորումներ, որոնք կմեծացնեն իրականացվող ուսումնասիրությունների ծավալն ու ցանկը։
Հայաստանում ԿԶԵՀ-ի պորտֆելը գերազանցում է ավելի քան 540 միլիոն դոլար արժողությամբ 10 նախագծերը (հաշվի առնելով 2024 թվականի մայիսի 20-ին ստորագրված համաձայնագիրը տնտեսական բարեփոխումների նպատակով Հայաստանի Հանրապետությանը 100 միլիոն դոլարի չափով ֆինանսավորման մասին):
Կայունացման և զարգացման եվրասիական հիմնադրամը 9 միլիարդ դոլարից ավել ծավալով տարածաշրջանային ֆինանսական մեխանիզմ է, որը հիմնադրվել է 2009 թվականին Հայաստանի Հանրապետության, Բելառուսի Հանրապետության, Ղազախստանի Հանրապետության, Ղրղըզստանի Հանրապետության, Ռուսաստանի Դաշնության և Տաջիկստանի Հանրապետության կողմից: ԿԶԵՀ-ի նպատակներն են նպաստել Հիմնադրամի անդամ երկրներում տնտեսական և ֆինանսական կայունությանը, ինչպես նաև աջակցել նրանց կայուն զարգացմանը:
