Այսօրվանից Հայաստան-Իրան պետական սահմանի Ագարակ սահմանային անցման կետում վերահսկողություն իրականացնում են միայն ՀՀ Սահմանապահ զորքերի ծառայողները․ Փաշինյան
ԵՐԵՎԱՆ, 30 դեկտեմբերի․/ԱՌԿԱ/․ Այսօրվանից Հայաստան-Իրան պետական սահմանի Ագարակ սահմանային անցման կետում սահմանապահ վերահսկողություն իրականացնում են միայն Հայաստանի Հանրապետության Սահմանապահ զորքերի ծառայողները, հայտնել է ՀՀ վարչապետ Նիկոլ Փաշինյանը։
Նա նշել է, որ մինչ այս, Հայաստանի անկախացումից ի վեր, Ագարակ անցման կետում սահմանային վերահսկողություն իրականացնում էին Ռուսաստանի Դաշնության Սահմանապահ զորքերի ծառայողները։
«Ուզում եմ նրանց շնորհակալություն հայտնել մատուցած ծառայության համար: Իսկ այսօրվանից սահմանապահ վերահսկողությունը ստանձնած մեր սահմանապահներին հաջողություն և բարի ծառայություն եմ մաղթում», – գրել է Փաշինյանը Facebook–յան իր էջում։
Ավելի վաղ ՀՀ ԱԱԾ տնօրեն Արմեն Աբազյանը հայտնել էր, որ 2025 թվականի հունվարի 1-ից Իրանի հետ սահմանին գտնվող Ագարակի սահմանային անցակետում սահմանային ծառայությունն ամբողջությամբ կիրականացնեն Հայաստանի սահմանապահ զորքերը։
2024 թվականի հոկտեմբերի 8-ին ՀՀ վարչապետի մամուլի քարտուղար Նազելի Բաղդասարյանը հայտնել է, որ ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հանդիպման ժամանակ պայմանավորվածություն է ձեռք բերվել, որ 2025 թվականի հունվարի 1-ից Հայաստանի ԱԱԾ սահմանապահ զորքերը կմասնակցի Իրանի և Թուրքիայի հետ պետական սահմանների պաշտպանությանը։ Միաժամանակ հստակեցվել է, որ Իրանի հետ սահմանի անցակետում ծառայելու են միայն հայ սահմանապահները։
