«Armenia Airways» նոր ավիափոխադրողը կատարել է իր առաջին չվերթը Երևան-Թեհրան-Երևան երթուղով
20.06.2019,
15:48
Ավիաընկերությունը հուլիս ամսվա ընթացքում նախատեսում է ձեռք բերել իր երկրորդ օդանավը։
ԵՐԵՎԱՆ, 20 հունիսի./ԱՌԿԱ/. «Արմենիա Էյրվեյզ» ավիաընկերությունը հունիսի 15-ին իրականացրել է իր առաջին չվերթը Երևան-Թեհրան-Երևան երթուղով, հաղորդում է Քաղաքացիական ավիացիայի գլխավոր կոմիտեի մամուլի ծառայությունը։
«Քաղաքացիական ավիացիայի կոմիտեն շնորհավորում է «Արմենիա Էյրվեյզ» ավիաընկերությունը՝ ցանկանալով անվտանգ թռիչքներ և օդային փոխադրումների աշխարհագրության ընդլայնում», – նշվում է գերատեսչության հաղորդագրության մեջ։
Կոմիտեն նաև տեղեկացնում է, որ ավիաընկերությունը հուլիս ամսվա ընթացքում նախատեսում է ձեռք բերել իր երկրորդ օդանավը։–0–
