Գինեգործական վերնիսաժը հնարավորություն կտա հայ սպառողին ավելի լավ ճանաչել հայկական գինին. Հիմնադրամի տնօրեն

ԵՐԵՎԱՆ, 16 օգոստոսի. /ԱՌԿԱ/. Օգոստոսի 18–ին Փարաքար գյուղում անցկացվելիք Գինեգործական վերնիսաժը, նախևառաջ, հնարավորություն կտա հայ սպառողին ավելի լավ ճանաչել երկրում արտադրվող գինին, ուրբաթ հայտնեց միջոցառման կազմակերպիչ, «Արենի» փառատոն» հիմնադրամի տնօրեն Նունե Մանուկյանը։  

«Գյուղացիներին խաղողի մթերումների լավ ծավալների ապահովման համար գինու արտադրողները պետք է սկզբում իրացնեն իրենց արտադրանքը։ Դա էլ հենց մեր Վերնիսաժի նպատակն է` ներկայացնել գինին ներքին սպառողին»,– ասաց Մանուկյանը «Նովոստի» միջազգային մամուլի կենտրոնում կայացած ասուլիսի ընթացքում։

Ըստ նրա, Վերնիսաժի մասնակցության հայտերը հայ արտադրողներին ուղարկվել են «Արենի փառատոն» հիմնադրամի և Արդյունաբերության զարգացման հիմնադրամի կողմից։ «Դուք երևի գիտեք, որ պետությունը մշակել է գինեգործության և կոնյակի արտադրության զարգացման ռազմավարություն, և դրա կետերից մեկը մեր գինին Հայաստանի ներքին շուկայում ներկայացնելն է»,– ասաց նա։

Ըստ Մանուկյանի` չնայած ձեռնարկվող ջանքերին, մասնակցության հայտեր են ներկայացրել միայն հինգ արտադրողներ, որոնց գործարանները տեղակայված են հայկական մայրաքաղաքից ոչ հեռու։ «Ցավոք, գործընթացը դանդաղ է առաջ գնում ինչպես արտադրողների, այնպես էլ հյուրերի մոտ»,– ասաց նա։

Մանուկյանը միաժամանակ նշեց, որ կազմակերպիչների ծրագրերում կա նմանատիպ վերնիսաժ անցկացնել ամիսը մեկ անգամ։ «Դա ձեռնտու է ինչպես արտադրողին, այնպես էլ բնակչությանը, որը կիմանա, որ ամիսը մեկ անգամ կարող է ավելի էժան գնով գինի ձեռք բերել, քան խանութում, արտադրողներն իրացնում են իրենց արտադրանքը»,– ասաց նա։

Մանուկյանը նշեց նաև, որ վերնիսաժը Փարաքարում հաճախ շփոթում են Արենիում գինու ամենամյա փառատոնի հետ։ «Չէի ցանկանա, որ այդ միջոցառումները շփոթեն։ Փառատոնը գինու տարվա ավարտն է, և դրա շրջանակներում մենք հյուրերի ենք հրավիրում արտասահմանից, մարդկանց, ովքեր համտեսում են և գնահատում  հայկական` տնային և գործարանային գինիները, ու մենք որոշում ենք, թե որն է լավագույնը։ Իսկ վերնիսաժներն անցկացնում ենք` ելնելով մեր գինու առաջխաղացման ռազմավարությունից։ Դրանք յուրօրինակ փրոմո–ակցիաներ են»,– ասաց նա։

Վերնիսաժի մշակութային ծրագիրը կապահովի «Կարին» երգի և ազգագրական պարերի համույթը։ Համույթի ղեկավար Գագիկ Գինոսյանի գլխավորությամբ խումբը ոչ միայն ազգային պարեր կներկայացնի, այլ նաև պարել կսովորեցնի տոնի մասնակիցներին։

Սուրբ Աստվածածնի վերափոխման օրվա կապակցությամբ անցկացվող միջոցառմանը, որի ժամանակ կատարվում է խաղողօրհնեքը, համույթը կներկայացնի «Ֆնջան» պարը, որը կապված է հնագույն Հայաստանում գինու պաշտամունքի հետ։ Միաժամանակ, ինչպես հայտնեց ինքը Գինոսյանը, Հայաստանի որոշ մարզերում գինու պաշտամունքի հետ կապված տոներն ու ծեսերը պահպանվում են առայսօր։

«Կարին» համույթին կմիանան նաև Փարաքար գյուղի պարի խումբը։ Իսկ Վերնիսաժի բացման արարողությունից առաջ խաղողի օծման կարգ կկատարվի տեղի եկեղեցում։

Ներկայում Հայաստանում գործում է գինեգործական 20 փոքր և միջին ընկերություն։ Հայաստանում խաղողագործությամբ է զբաղվում 40 հազար մենատնտես, ընդ որում` խաղողի 90 տոկոսն ուղղվում է կոնյակի արտադրությանը և միայն 10 տոկոսը` գինու։

Վիճակագրության տվյալներով, այս տարվա հունվար–հունիսին Հայաստանում գրանցվել է գինու արտադրության 20.7 տոկոս աճ` մինչև 2 425.4 լիտր։ -0-