Հայաստանի տարածքով կարող է անցնել Արևելքից Արևմուտք նոր վճարովի ճանապարհ․ Փաշինյան
ԵՐԵՎԱՆ, 1 հունիսի․/ԱՌԿԱ/․ Միջազգային ներդրողները հանդես են եկել նոր առաջարկով, որով նախատեսվում է չափել Ադրբեջանից Հայաստան ամենակարճ ճանապարհը և միջազգային բեռնատարների համար վճարովի դարձնել, հայտարարել է ՀՀ վարչապետ Նիկոլ Փաշինյանը։
Նրա խոսքով, ճանապարհը կարող է անցնել Տավուշի, Լոռու և Շիրակի մարզերով։
«Հաշվարկում են, որ այդ ճանապարհն այնքան է կարճանում, որ վարորդները կնախընտրեն վճարեն և այստեղով անցնեն», - ասաց Փաշինյանը Տավուշի մարզում քարոզարշավի ժամանակ։
Նա նշեց, որ այժմ իրականացվում է հետազոտություն՝ պարզելու համար, թե որն է այդ ճանապարհը։
Վարչապետի խոսքով՝ այսօր հարկավոր է կենտրոնանալ նաև երկաթուղու վերաբացման վրա, ինչը շատ իրատեսական է և թույլ կտա ստանալ Արևելքից Արևմուտք ամենակարճ երկաթուղին։
«Դրա համար մեզ պետք է անել հետևյալը. Հաղարծին գյուղի սողանքը պետք է վերացնել։ Դա մեծ փող է՝ մոտավորապես 500 մլն դոլար, բայց եթե այդ մտածածն իրոք արդարանա, որ դա ամենակարճ ճանապարհն է, այդ փողը կդրվի, որովհետև փող դնողը կիմանա, որ հետ է բերելու այդ փողը», - նշեց Փաշինյանը։
